ها علاش صحاب البي جي دي ما يمكنش يتبعو بنكيران ولا صحابو. ناس الحزب بانت فيهم النعمة ووجوههم ضواو ولباسهم تقاد والطونوبيلات اللي جاو فيها بحال طونوبيلات ناس البام =صور=

واش من نيتك كتسنى هاد المجلس الوطني الاستثنائي يكون فيه شي حاجة؟ غير تهنى حتى حاجة ما غادية تبدل. حتى نقاش سياسي حقيقي ما غادي يتجبد” هاد لكلام لقيادي من حزب العدالة والتنمية هاد الصباح قبل انطلاق الدورة الاستثنائية للمجلس الوطني ببوزنيقة. بالنسبة للقيادي اللي محسوب على تيار بنكيران ل”كود” “كاع النقاش اللي كيقلق بحال التحالف مع التجمع الوطني للاحرار والضربات اللي تلقاها الحزب الحليف التقدم والاشتراكية بعد حذف كتابة الماء واثارة شكون اللي اتاخذ القرار واش رئيس الحكومة ولا جهة اكبر منو. هاد الشي كولو ما غاديش يتناقش”.
لكن علاش وقع هاد الشي فحزب كيقول عليه امين عامو ورئيس الحكومة الحالية باللي هو الحزب الاول؟ علاش ولى بحالو بحال الاحزاب السياسية. علاش كيتصرف وكأن لبلاد ما فيهاش ازمة وكأن السياسة ما تقتلاتش؟ بلا ما تقلبو بزاف على الجواب٬ غير دويرة على غالبية الوجوه اللي ماشي مشهورة من اعضاء المجلس الوطني للحزب تقدم بعض الاجوبة. بنكيران باش كان امين عام ورئيس حكومة ديما كان كيردد ما فيها باس تقاد الوضعية ديال ناس الحزب باش يوليو فالمسؤولية ولكن خاص الخدمة وهاد الشي خاصو “يكون بمقدار”. غير اللي كيشوف سحنات هاد الاعضاء والعضوات كيلاحظ تغيير كبير بزاف. لوجه ديالهم ولى ضاوي مقارنة بيهم هادي مدة ولباسهم وتحسينتهم كتبين باللي ناس البي جي دي اليوم ماشي هما ناس البي جي دي ديال غير بدية حكومة بنكيران ف2012.
اللي كيبين هاد النعمة اكثر هي الطونوبيلات اللي كانو حاطينها فالباركين اللي قبالة الباب الرئيسي ديال المركب اللي احتاضن المجلس الوطني للحزب. قبل باش كانو كيديروه فالمعمورة كان يجيو غالبيتهم فكار كيوجدوه لهاد الغرض. اليوم كاينة الكاط كاط من كاع الانواع من الآودي والبي ام ودجيب ورانج وكانيات الطونوبيلات من ماركات كانت قليلة بزاف بزاف فالحزب. الباركين ديال العدالة والتنمية اليوم السبت 15 شتنبر 2018 بحالو بحال الباركين ديال حزب الاصالة والمعاصرة اللي كان دار مؤتمرو تماك. يعني حزب ناسو ترفحو ودخلو اللعاقة. لباس اللي فالمسؤولية من عيالات ورجالة تغير. ولات الالوان مفتوحة عوض اللوان المغلوقة. مباهج الحياة بانت عليهم. حتى ايلى لبسو لكحل بحال كيف ما دارت بسيمة الحقاوي وزيرة المرأة والتضامن ولا كاتبة الدولة في الصناعة التقليدية جميلة مصلي٬ اليوم فالمجلس الوطني٬ كيكون كحل انيق حقاش المادة اللي مكونة منها اللباس والصاك والزيف ماركات معروفة.
اعضاء المجلس الوطني ديال البي جي دي اللي جاو اليوم اكيد ما غاديينش يطلبو الا يحافظو على وضعكم. اتباع بنكيران فهاد المجلس قلال واتباع الحفاظ على هاد الوضع الاجتماعي والمادي غاديين يرفضو اي نقاش يقدر يهددهم ويرجعهم يركبو فالكار ولا فداسيا ولا بيكانتو… يمكن هاد الشي اللي كيفسر علاش بنكيران جا والمجلس الوطني انطالق ورجع للاور باش ما يحرج حد ورجع لدارو وخلى النقاش مفتوح.