فاجعة فايت باعمران. الشتا دات عائلة كلها عيالات. كانو يجمعو ارگان غفلاتهم السيول وقتلات 4 من عائلة احد اعيان المنطقة والمسؤول الاول الحكومة اللي كذبات عليهم ف2014

فاجعة واش من فاجعة عرفاتها ايت باعمران البارح. اليوم الصباح لقاو جوج الجثث ديال جوج عيالات لاحهم الواد باقليم كلميم. هاد الجثث ديال العائلة اللي غفلها الواد البارح ودا منها 4 . البارح لاح جوج فاقليم سيدي ايفني واليوم جوج.
الفاجعة ان هاد العائلة كانت كتجمع البارح فتيكتان فايت باعمران بسيدي ايفني الفيوش =ثمار اركان=. كانو ستة النساء فيهم بنات صغار. عياو وبغاو يستارحو شوية. غفلاتهم واحد الشتا خايبة وتبعاتها سيول. دات 4 من اصل 6 وكلهم ما عائلة وحدة ومن فاميلة عضو فالمجلس الجماعي لكلميم وعضو بغرفة التجارة واحد اعيان المنطقة. الواد دا ليه اختو ومرت خوه وبنت خوه وقريبة منو.
اللي تنقد هو مرا حصلات فالخيمة وتلوات عليها وبنت صغيرة عندها عامين لاحها الواد.
الفاجعة اللي خاصو يتحاسب عليها هي السلطات المعنية من حكومة ونزل للتحت. ياك كلهم كانو كيهللو بمشروع فالمنطقة بعد فيضانات 2014 وعقلتو على داك الشي. وزراء كيدورو بطيارات وسلطات كتوعد بمشاريع كبيرة وووو. فين هاد الشي كولو. كيفاش ما دار والو حتى رزا عائلة كلها وكلهم عيالات. فضيحة وصافي