وخا روينة اختطاف خاشقجي. أردوغان عطا كادو لترامب و طلق ليه القس المتهم بالارهاب

طلقات محكمة تركية اليوم القس الامريكي اندرو برانسون اللي كان تحت الاقامة الجبرية و كان هاد الموضوع ديالو جبد الصداع بين ترامب و اردوغان.
التخريجة اللي لقاو الاتراك باش يشدو الخاطر لترامب اللي كان واعد الامريكيين من قبل انتخابه بانه غادي يطلق القس باي ثمن، التخرجية هي انه وخا محكوم عليه ب3 سنين فلأن عندو سلوك مزيان ف الحبس غادي يطلقوه و يديروه ف الاقامة الجبرية و من بعد قررو كاع يطلقوه يمشي بحالو.
وهاد القس كان ساكن ف تركيا من عشرين عام تال نهار اللي شدوه الاتراك و قالو ليه انت متهم بالارهاب و التجسس و كتدعم حزب العمال الكردستاني و وشبكة فتح اللح غولن اللي اتهموها بلي دارت محاولة انقلاب ف 2016.
ترامب كتب ف تويتر كما العادة و قال ” بغينا نشوفو القس ف مريكيان بالزربة و راني كنصلي ليه ، و راه انا اللي درت مجهود كبير حتى خرج من الحبس “.
وكان ترامب زير الاتراك مزيان على ودو، بحيث فرض عليهم عقوبات اقتصادية و كان بغا يدير حصار كاع، ووقف معهم بزاف ديال اتفاقيات التعاون وحتى شي ابناك بلوكا ليها فلوسها.
المهم ترامب فرحان بزاف بهاد الكادو اللي جاه من اردوغان فوقت الانتخابات وخا كاين ازمة اخرى ديال الصحفي خاشقجي مزال ماتفكات حريرتها.