الجبن والخوف على اللعاقة والجاه: ثلاثي اللعاقة : بنشماس بنعزوز ولمحرشي ما حلوش فهمهم وبنعدي ما كانتش عندو الشجاعة كاع يجي وبلحاج تغدى وخرج وبيد الله واخشيشن وبكوري: الجبن والخوف

تضاربت الاراء حول المجلس الوطني لحزب الاصالة والمعاصرة. ناس الحزب فرحو بنشاطهم. قالو باللي كان فيه 120 تدخل وكانت الناس مطلوقة وعبرو على كلشي اللي ضارهم. جبدو كلشي وفق قيادي من الحزب ل"كود" "اللي عجبني بزاف بزاف هو التشبث بالمشروع والاعضاء مستعدين للنضال وغالبية المداخلات كانت فالمستوى. بل ما عمرها كانت فهاد المستوى".
كاين اللي قال باللي هاد المجلس غير مسرحية وجد ليها الياس العماري مزيان باش يتراجع على استقالتو من الامانة العامة للحزب. هو بالفعل رجع ولكن القيادي يشدد في تصريحه ل"كود" بان هاد العودة كانت باش ما يوقعش الفراغ واكثر من ذلك باش ما يتريبش الحزب. استقالة بلا ما يكون البديل والفراغ اللي كان غادي يكون كان غادي يضرب هاد الحماس اللي شفناه فالمجلس الوطني.
لكن واش هدرو على كلشي فهاد المجلس؟ اييه على كلشي. دارو فالياس العماري. دارو ففاطمة الزهراء المنصوري =واخا ما دارت والو دارو فيها اتباع الياس= ولكن اكثر من ذلك جبدو فلوس وترفيحة بنشماس وبنعزوز ولمحرشي "ما عمرنا وصلنا لهاد المستوى ابدا" يشدد مصدر "كود".
حكيم بنشماس رئيس مجلس المستشارين المتهم بشراء قصر ماشي فيلا واخا هو فقير ما عندو فلوس ما دخلتش يدافع على راسو. ما هدرش على هاد الفضيحة "واخا المكتب السياسي كينوب عليه متدخل واحد =لحبيب بلكوش= ولكن كان خاصو يدخل بحالو بحال بنعزوز رئيس فريق البام في مجلس المستشارين اللي حتى هو متهم بالاغتناء فزمن قصير. زيد عليهم العربي لمحرشي مول فضيحة كاليك كيقرا الفلسفة فالثالثة ثانوي. السيد ما معروفاش الشهادة اللي عندو ولا كيفاش حصل عليها واكثر ذلك قال في محضر انه دوز عام الحبس سنة 1998 من اجل جريمة النصب. حتى هو ما دخلش وضربها بسكتة.
ماشي غير ثلاثي اللعاقة اللي سدو فمهم. هادوك اللي محسوبين على الحكماء طلعو اكثر جبنا. حسن بنعدي اللي كيتخلص على منصب ما كاينش شي تخربيقة اسمها اكاديمية فالحزب وكيربح 30 الف درهم واللي صدعنا فالايام الاخيرة بتصريحاته ما جاش كاع للمجلس الوطني. نهار المواجهة تخبى. احمد اخشيشن محسوب على حكماء الحزب بحالو بحال الشيخ بيد الله ومصطفى بكوري ضربو الطم وسكتو ما هدروش ما سمعناش صوتهم فهاد اللحظة الحرجة اللي كيعرفها الحزب. اما علي بلحاج فغير سالى لغدا ومشى فحالو كتب تدوينة غاضب وبالفرنسية. غباء ما له من غباء. اولا باش تخدم فحزب مغربي وعندك رغبة تواصل مع مناضلي حزبك او لمغاربة كتب بالعربية. تعلم. اما ايلى كانت تدوينتك موجهة للي جابوك راه ما فاهم والو وغير كتخربق. منتهى الجبن السياسي وصافي.
فالحقيقة الشباب ديال الحزب طلعو هما الحكما. دخلو ودافعو واحتجو وغضبو. عبد اللطيف وهبي كان نجم. حقاش طلع قد فمو قد دراعو. حضر وقال لالياس العماري سير فحالك ولا ما استاقلتيش انت انا نستاقل. دابا نتسناو اش غادي يوقع فالشهرين الجايين باش نعرفو اش غادي يوقع. وهبي صفقو عليه حقاش كال اللي كيخافو يقولوه هادوك الحكماء واللي حاولو يخبيوه ويخلقو صورة ايجابية لالياس العماري بحال ثلاثي اللعاقة. المصالح ولفلوس والشوهات كيتخلي الحكما جبنا والسياسيين للي ترفحو فالدقيقة تسعين اقل جبنا بلا ما نقولو شي كلمة اخرى