سكوب. اش واقع. من الفوق جات. التصريح اللي نوضها البارح فالمغرب ديال وزير الشبيبة والرياضة على عدم ترشحنا ل”الكان 19″ تمتع يدوز ف”الرياضية” وباقي قنوات القطب العمومي

“كود” بحال عدد من الناس البارح تبعات برامج الرياضية كتسنى فالتصريح اللي عطاه رشيد الطالبي العلمي وزير الشبيبة والرياضة للقناة بخصوص ان المغرب ما عمرو تقدم بترشيحو للتنافس على احتضان كأس افريقيا للامم 2019 اللي تحيد من عند الكاميرون.
نفس التصريح كانت تنشارو كود بعد تصريح حصري للوزير ل”كود” ولكن قناة الرياضية وفق مصدر “كود” سجلات معاه فبوزنيقة. لاحتو فالفايس وتويتر ديالها. بركنا كنتسناو كنتسناو يدوز وما دازش.
تحريات “كود” وصلات لخلاصات فشي شكل. وفق اكثر من مصدر داخل الشركة الوطنية للاذاعة والتلفزيون ل”كود” فان “اوامر عليا” هي اللي وقفات بث التصريح. كان من المتوقع يكون فالرياضية ويدوز ف”الاولى” راه سبق مزيان. هاد الشي كولو ما كانش.
اذن هاد المنع واش كيعني ان الوزير تسرع فهاد التصريح وباللي القرار ديال التنظيم من عدمه اللي بيد الفوق ماشي بيد الحكومة؟ او ان الامر وما فيه ان التصريح تمنع بامر من الرئيس المدير العام للقطب العمومي فيصل لعرايشي. حقاش التصريح الشهير دار فبوزنيقة فحفل كان ترأسو كل من الوزير ولعرايشي بصفته رئيس اللجنة الاولمبية وكان مخصص لتكريم الابطال المغاربة المشاركين فالبطولة الافريقية اللي كان فالجزائر والابطال الشباب اللي شاركو فالالعاب الاولمبية للشباب فامريكا اللاتينية
البارح “كود” هدرات على حرب باردة بين الجامعة الملكية لكرة القدم وبين وزارة الشبيبة والرياضة. هادا وجه من هاد الحرب