هادو مراض عقليا. وراه عيب وعار على نخبة ضد التطرف وكدينو كتروج فيديو علي ارهاب شمهاروج رسميا مازال ما تمش التأكد من صحتو. شي فنانة وشي وجوه كتكره حتى الاسلاميين وكتنشرو

كاين تحقيق على جريمة شمهاروش الارهابية اللي تقتلات فيها دنماركية ونرويجية. الوكيل العام بالرباط عطى معطيات البارح. قبلو الناطق الرسمي باسم المديرية العامة للامن الوطني دار تصريح. بجوجهم گالو هدرة وحدة: الفيديو اللي كيروج على قتل السائحتين لم يتم التأكد من صحته بعد. هاد الصباح اكد مصدر رسمي ل”كود” باللي مازال كيحققو فيه. كيبحثو واش صحيح ولا اللا. يا عباد الله. هنا كنهدر على هادوك لمراض المتخلفين اللي اكتشفنا البارح باللي موجودين٬ عيب وعار تروجو هاد الفيديو. ماشي غير عيب وعار راه اللي كيروجو مريض عقليا.
الصدمة كانت كبيرة باش ناس كتمثل النخبة. منهم ممثلين. منهم مدراء شي مؤسسات منهم موظفين منهم فنانين. منهم سياسيين. كيروجو فيديو القضاء والامن كيقول راه ماال يتم التأكد من صحتو. بل شي وحدين من هاد الفئات مشى بعيد. اييه كيكره بزاف بزاف الاسلاميين ولكن لاح الفيديو فصفحتو. هنا ما نهدروش لا على القانون ولا على احترام عائلات الضحيتين ولا على هاد الشي كولو. كنهدرو على فيديو مروع خايب بزاف.
واش بنادم اللي فكامل قواه العقلية يقدر يشوف هاد الفيديو فما بالك يبارطاجيه. هاد الفيديو المشكوك فيه ما قدرتش نشوفو. اللي عاونو فترويجو خاصهم سبيطار للامراض العقلية. راهم خطيرين على هاد المجتمع بحالهم بحال الارهابيين.
يا ودي مع من عايشين وكيكولو اه تصدمنا مع الفعل الارهابي الشنيع. وراكم انتوما فيكم بدرة ديال هاد الفعل. كاليك نخبة.