مزوار تسيف. رئيس الباطرونا دگدگ مريم بنصالح داز على الباطرونا اللي حفرات ليه جبد الشرعية هاجم ريع المعارضة واعتابر دخولها لمجلس المستشارين “شر”

صلاح الدين مزوار رئيس الباطرونا دار ندوة صحافية فالصباح. مزوار فعفع هاد المرة اللي كان كيحفر ليه. سكت بزاف. هو بنفسو قال باللي تعطل بزاف وباللي هاد الشي خطأ رتاكبو. مزوار فلقاؤو الصباح كان واضح ميطوديك. كيتنقل من موضوع لموضوع بوضوح. عباراتو قصيرة وجملو فيها الصرامة اللازمة. كان مقنع فخطابو. مختالف بزاف على مزوار ايام رئاسة الاحرار ولا وزارة الخارجية. كان متحرر اكثر. دار نقد ذاتي اعتارف باخطائو خاصة فالتواصل. بين باللي محارب وما خايفش
مزوار هنا كيهاجم وكيقنع. فعادتو سابقا ديما كيهاجم بلا ما يقنع حتى راسو. هاد الصباح فكازا كان مزوار اخر. رئيس الباطرونا تكلم بلا عقد حتى على رفض الباطرونا او جزء منها ليه. كيفاش كانو كيعتابروه ديالهم باش كان وزير المالية او زعيم الاحرار وكيفاش كيرفضوه شي وحدين اليوم. لكلام كان موجه بشكل مبطن لرئيسة الباطرونا السابقة مريم بنصالح بلا ما يجبدها بالاسم.
بدا بالهدرة على اسلوبو الجديد “كل واحد عندو اسلوب عندو منهجية عمل لتدبير منظمة بحال الباطرونا. مهمتي التفكير فالمستقبل ونوجدو الجيل الجديد الخلف” يقول رئيس الباطرونا. عارف باللي هاد الشي غادي يجبد ليه الصداع. هاد الشي علاش قال باللي هو “رياضي” كيشير كتاريخو كلاعب باسكيط وبتجاربو فالحكومات والحزب. انتقد اللي ما كيعتارفش بالخسارة “كاين موفي بيردون” ودعا باش الباطرونا تنفتاتح.
تكلم على النظام الاساسي للباطرونا فحديثو عن تعيين اعضاء المجلس الاداري. كيفاش هاد الموضوع واقفو عليه فالمجلس الاداري من بعد لقى النقاش فالصحافة. هاجم هاد اللي سربو بلا ما يهاجم الصحافة. هنا كان ذكي. اعتابر هاداك الشي تشويش على ولايتو وقال باللي ما غاديش يتراجع وغادي يقاد هاد النظام الاساسي الجديد
من لحوايج اللي هدر عليها ما اثارته نايلة التازي نائبة رئيس مجلس المستشارين سابقا اللي جا فبلاصتها حميد الصويري. قال باللي هو “ماشي سيكسيست” وباللي ضد يكون الامير المتحكم ففريق الباطرونا فمجلس المستشارين. هنا هدر علي موقفو الاول من دخول الباطرونا لمجلس المستشارين واعتابرها “شر”. دابا اوضح باللي خاص احترام اللي تم التصويت عليهم. كما كشف ان غير جوج اللي تقدمو لمنصب نائب رئيس مجلس المستشارين هما الصويري وعبد الكريم وباللي غير واحد اللي تقدم لرئاسة الفريق هو هاداك حيفظي
سالا من هادي داز لقضية احمد رحو اللي بعد من الباطرونا وقال باللي هاد الشي كيهم رحو وهو اللي خاصو يهدر ويشرح ماشي الباطرونا.
هنا هاجم “ريع المعارضة” وشدد على انو غادي يواجهو ويحاربو وما غاديش يديها فاللي كيشوشو عليه وكيشوشو علي ولايتو. “ما كاينش ريع المعارضة وما غاديش نقبلها فهاد الولاية ديالي. ندير كاع المعارك باش ما نديرش “لوفي دو برانس” و”ريع المعارضة” يشرح مزوار
مزوار صفى حساباتو حتى مع ناس كثار. خرجة ذكية بخطاب مقنع. كان فيه الوضوح. بحال ايلى تحرر من كلشي. بحال ايلى كيقول حتى حد ما داير في شي خير. دابا خاص ناس فالباطرونا يدافعو عليه. يديرو خرجات باش تكون هاد الخرجة عندها قيمة