سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
صحاب البام داخو من تدوينة زعيمهم المستقيل. قيادي ل"كود": حنا ماشي حزب وبزاف اللي ضد الياس غاديين اما يسكتو فالمجلس الوطني ولا يهزوه على لكتاف مازال الخوف متحكم وكنحذر من سيناريو كاتالونيا ايلى بقاو ريافة متحكمين فهاد الحزب
فيراج كبير بزاف كيعيشو حزب الاصالة والمعاصرة يومين قبل المجلس الوطني ديالو اللي كان داير استقالة الياس العماري فجدول الاعمال غير للاخبار قبل ما يتم تعديل هاد الشي ويسمحو لهاد المجلس يعدلها. تعديل دخل بعدما دخلو اتباع الامين العام المستقيل الياس العماري. لكن اللي دوخهم وفق ما نقله عدد منهم ل"كود" هو "كيفاش واحد استاقل ورجع فالدقيقة تسعين وحرك صحابو باش يشوشو". المصدر اكد ل"كود" "باينة السيد تنادم معاه الحال وما سخاش". لكن واش الحزب مشرع هاكا "اييه. راه البام ماشي حزب. شفتو كيفاش صوتو عليه. فمؤتمر طلعوه بالتصفيق. باش طلع دار صحابو اللي كيدافعو عليه. كيخلعهم بعلاقاتو ولكن واخا براكتو طارت راه مازال كيخلع شي وحدين. انا ما معولش على ناس الحزب ياخدو موقف. كنعرف بزاف منهم ضدو ولكن غاديين اما يسكتو ولا يهزوه فوق كتافهم. اييه هاد الشي عبثي ولكن هو الواقع" يضيف مصدر "كود". المصدر اعتبر ان ظهور ايميل فيه "البام" يهاجم الامين العام المستقيل داخل فهاد الخطة. توقيتو =تنشر البارح الخميس= دار باش يعطيه مبرر اخر يرجع واخا كيهاجمو كيجبد لفلوس وامور اخرى لكن عودة الياس غادية تكون مكلفة للحزب. سبق نشرات الصحافة ان عبد اللطيف وهبي وحسن بنعدي وماشي بعيد بيد الله وفاطمة الزهراء المنصوري غاديين يغادرو الحزب ايلى رجع الياس. ماشي غير هادو كاينين ناس كثار غاديين يخرجو بلا ما يقولوها لحد وفق مصدر حزبي ل"كود". هادو ضد "هيمنة الريف" على الحزب. هيمنة يقول مصدر "كود" بينات ان اللي كيهمهم غير مصالحهم. حقاش باش ناض حراك الريف اول من هاجموهم صحاب الحراك هو الياس وصحابو. يعني ما قاموش بدور الوساطة. المصدر ذكر بخطاب عيد العرش اللي فيه اشارة لالياس العماري وفق ما اكده وفيه ان شي وحدين فشلو فخدمتهم وطامعين الفضائح المالية للي كيعيشوها قيادة الحزب بحال حكيم بنشماس وعزيز بنعزوز وفضايح لمحرشي وكلهم ديال الياس العماري غادية تزيد تخلي الناس تهرب من الحزب ايلى رجع لامانة الحزب. مصدر "كود" شدد على نقطة وحدة "هاد المجلس الوطني غادي يكون تاريخي. كيفما كان اش غادي يوقع. غادي يكون تآثير كبير بزاف على مستقبل الحزب. اما يطور ويزيد للقدام ولا يهربو منو ناسو ويولي حزب قومي وقريب نوليو بحال كاتالونيا" يحذر القيادي في حزب التراكتور
