فضيحة مكتب بنشماس. كيكره لمرا ومعاهم محكوم عليه ومعزول من طرف الداخلية والمجلس الدستوري ما دارش خدمتو

شوهة كبيرة بزاف اليوم فمجلس المستشارين. شوهة للمغرب للديموقراطية للمساواة للمناصفة. كلشي ضربو حكيم بنشماس رئيس مجلس المستشارين اللي كيتزعم حزب الاصالة والمعاصرة من نهار تأسس وكلشي عارف شكون وفين٬ وهما كيكذبو علينا انو كيدافع على المرا وعلى المساواة.
صورة رجالية فيها بنشماس فرحان مع نوابو الخمسة. فين لمرا. ما كايناش. ما عندهاش بلاصتها فمجلس بنشماس. تصورو كون كان شي بيجيديستي هو رئيس المجلس ودار هاد الشي اش غاديين يديرو ليه. لفضيحة دايرها واحد كيداعي الحداثة.
هاد الشي ديال تغييب لمرا كلشي متواطئ فيه. الباطرونا دارو فيلم فشي شكل باش يجيبو هاداك الصويري فبلاصة نايلة التازي. كلشي خطط ليه حيفظي رجل ادريس البصري اللي كيشغل رئيس الفريق
لفضيحة لخرا فهاد الصورة وهي على نفس الخطورة. اللي كاين اقصى يمين بنشماس يدعى محمد عدال وهو من الفريق الدستوري الديموقراطي الاجتماعي. هاد السيد يشغل منصب الامين فهاد المجلس.
محكوم عليه بالمحكمة الإدارية بمكناس اللي كتقول خاصو يتم عزلو من رئاسة جماعة مريرت و تجريده من عضويتها مع ما يترتب عن ذلك من آثار قانونية بما فيها. بهاد الرئاسة خدا عضوية فمجلس المستشارين. من بعد تحكم عليه فشعبة جرائم الأموال بمحكمة الاستئناف بفاس بسبب اختلالات فعهد رئاستو للجماعة. يعني تقرير المجلس الاعلى للحسابات فضخو والداخلية دعاتو وتم الحكم عليه ومازال فمجلس المستشارين.
المجلس الدستوري يتحكم المسؤولية وخاصو يتحاسب لانو كان خاصو يبث فهاد القضية قبل ما يتم انتخاب مكاتب مجلس المستشارين وما دارش خدمتو حتى وقع التنصيب حقاش ما عندو علاقة بالديموقراطية اللي وقع اليوم.
دابا رئيس الدولة كيقول هدرة فافتتاح الدورة الخريفية وكيجي امثال بنشماس وعدال وكيضربو كلشي فالزيرو.