بالتزامن مع بدء زيارة ملكها للمغرب. نايضة فاسبانيا: الانفصاليون طيحو ميزانية رئيس الحكومة وانتخابات تشريعية متوقعة فابريل

نايضة بزاف فاسبانيا. البارح بدات محاكمة 12 من الانفصاليين الكاتالانيين فالمحكمة العليا بمدريد واليوم جا خبار خايب للحكومة. ترفضات الميزانية ديال حكومة الاشتراكي بيدرو سانشيز. هاد الشي كيعني رسميا سالات حكومتو وخاصو يعلن على تاريخ لانتخابات تشريعية سابقة لاوانها.
فهاد الصباح كان التصويت على ميزانية الحكومة. اليمين والوسط من خلال “الحزب الشعبي” و”سيودودانوس” صوتو ضد هاد الميزانية. اللي تزاد عليهم هما الانفصاليين اللي كانو دعمو الحكومة فالسابق. اليوم صوتو ضدها. مساعي “بوديموس” =اليسار الراديكالي الاسباني= لانقاد حكومة الاشتراكيين واقناع الانفصاليين كلها ما عطات والو.
اسقاط هاد الميزانية يعني انتخابات سابقة لاوانها. كلشي كيتسنى تصريح رئيس الحكومة اليوم باش يقول وقتاش هاد الانتخابات. الصحافة الاسبانية كتهدر على 28 ابريل المقبل وشي كيهدر على ماي وشي كيهدر على 14 ابريل. المهم ازمة سياسية خاصة ان اللي طيح هاد الحكومة هما الانفصاليين.
احزاب اليمين واليمين المتطرف كانت دارت مسيرة نهار الاحد اللي فات باش طيح هاد الحكومة واتهمو سانشيز بعقد صفقة مع انفصاليي كاتالونيا.
وسط هاد الاجواء غادي يبقى ملك اسبانيا ومراتو اليوم زياتو للمغرب. زيارة فوضع سياسي متأزم عندهم فالجارة الشمالية