علاش الواحد غايجلس مقاتل مع النصابة لي كايبغيو يستاغلو فترة الصيف باش يطحنو المواطن لي باغي يدوز العطلة في حين كاينين بلادات اخرى بشواطئ جذابة و نقية ! ناس نقيين ! ماكاينش بوزبال لي يتحرش بيك ! ماكاينش بوگرن لي يگوليك علاش لابسة المايو !

لاضربتي دورة هاد الايام فالمواقع ديال حجز لوطيلات فالانترنيت باش تريزيرفي شي اوطيل فمراكش و لا طنجة و لا أگادير غاتلقا غي الشوا و الكوا كلشي غالي و لا يتوافق مع القدرة الشرائية للمواطن ! الاثمنة واصلين لشي مبالغ خيالية ، بغيتي تكري برطمة غاطيح فشي سمسار يبغي يلصق ليك اخنز برطمة بزبالة د الفلوس لليلة، حتى الناس لي كايختارو يخيمو فالخلا و الغابات و الجبال كايلقاو راسهم عرضة للنصابة لي كايحتلو بعض المناطق الغابوية و الجبلية لي كايقصدوها السياح ! كاين شي بلايص لي لامشيتي دير فيهم السياحة غاتشري فيهم الخبزة بربعة دراهم خمسة الدراهم ! كلشي باغي ينصب عليك من لوطيل تال السمسار تال مول الطاكسي تال مول القهوة لي غايبيع ليك اقود قهوة بالدقة عالنيف ! و كانگولو علاش المغاربة ماكايشجعوش السياحة الداخلية ؟!
المشكلة ماشي فالغلا بحد ذاتو حيت الناس عارفين بلي هادي فترة الصيف و فالعالم كامل هاد الفترة موافقة لاهوت سيزو لي يمكن فيها الطلب كايفوق العرض و بالتالي الاثمنة كاترتافع ! و لكن المشكلة فالمغرب انه الاثمنة كاطلع و الجودة ديال الخدمات هي هي بل كاتزيد تكفس ! الاثمنة غير موافقة تماما مع الجودة لي كاينة ، و هادشي لي كايخلي بزاف ديال المغاربة يتقاتلو و يخسرو فلوس صحيحة باش ياخدو الفيزا ديالهم و يهربو يدوزو الصيف فأوروبا ! فشواطئ نقية مافيهمش بوزبال لي كايفرض عليك تاخد من عندو باراسول ! تقدر تكري برطمة محترمة نقية مجهزة بثمن معقول شي مرات ماكايتجاوزش خميسميات درهم للثلاتة د الاشخاص ! تقدر تركب وسائل نقل عمومية مريحة و غاتخلصها بثمن مناسب تقدر تكري طوموبيل بثمن مناسب ! تقدر تجلس تشرب قهوة فلاس بالماس حدا البحر بثمن ماكايتجاوزش اورو و عشرين !
شواطئ جذابة و نقية ! ناس نقيين ! ماكاينش بوزبال لي يتحرش بيك ! ماكاينش بوگرن لي يگوليك علاش لابسة المايو ! عيالات كايعومو ببزازلهم عريانين ! تاواحد مامسوق ليهم ! تقدر تكري بثمن مناسب و تاكل بثمن مناسب و تعيش العطلة على حقها و طريقها بثمن مناسب ! و الاهم من هادشي تحس براسك بدلتي الجو بصح !
علاش غانجلس نضارب مع السماسرية فمارتيل باش يكريو ليا برطمة بالف درهم ليلة ؟ و لا ناخد اوطيل فأگادير خانز بريحة القوادس ؟ و لا نمشي لمراكش ينصب عليا شي مول الطاكسي ؟ و لا نمشي لطنجة نتبحر و يجي عندي شي شمكار يبغي يكري ليا بزز باراسول ؟
للاسف المغرب فيه بلايص واعرين ! فيه بحورة فين يبانو ديال السبليون ! و فيه بلايص الطبيعة لي فيهم تخليك حال فمك و تحيي فيك الشباب ! فيه ضايات و جبال و مناطق جميلة لي ماكرهتش نشوفهم و نمشي ليهم و لكن مع كل محاولة كانلقى راسي راجعة معصبة من العطلة و خاصني عطلة غي باش نبرد و نرتاح ! واش حنا مسافرين نفوجو و لا نتقاتلو مع النصابة!؟
اللهم الواحد يهز قشو و يمشي يرتاح مع ولاد الناس.