حملة “كون نقي” او كيفاش شركة الزبل بغات تضحك على بيضاوة وترجعهم موسخين. رئيس جماعة: وعداتنا ب500 حاوية يالله جابو 100 ولا ما قدروش ينظفو يمشيو فحالهم

انتشرت اخيرا بشكل محدود “كون نقي”. مواطن يتصور مع اللي خدامين فجمع الازبال. الحملة دارت باش تحسس المواطنين باللي مشكلة الزبل هما اللي يقدرو يحلوها. هاد الحملة عندها علاقة بالشركة اللي كدبر الازبال فكازا من ابريل الماضي وعندها مرحلة انتقالية غادية تسالي ف31 اكتوبر.
علاش عندي مشكلة مع “كون نقي”، حقاش كتقول لبيضاوة كونو نقاية. اييه لوسخ كاين فالشارع فالفضاء العام فكازا وغيرها وهادا خاصو دراسات باش نعرفو الاسباب حقاش ما عندهاش علاقة بالمواطن واش نقي ولا للا. قبل ايام القمع كان شكل من اشكال الاحتجاج ضد السلطة. دابا اكيد عندها اسباب اخرى. لكن المشكلة ماشي فالبيضاوي كيف حاولات هاد الحملة دوز علينا. المشكلة فالشركة المكلفة بالنظافة بدرجة ادنى والمجلس المسير للدار البيضاء بشكل اساسي.
صحابي وصحاباتي كيكررو قصص بسيطة ولكن كتعطي صورة على خدمة هاد الشركة على البنية فكازا باش تكون نظيفة. ايلى شريتي شي حاجة قرعة الما ولا الساندويتش فالطريق وكليتيه وساليتي خاصك تجمع اللي بقى حتى ترجع لدارك حقاش ما كاينش فين دير هاد الشي. ما كاينش بلايص فكل درب فكل زنقة يقدرو المواطنين يديرو فيهم الزبل
هادي راها درجة كبيرة فالوعي بالنظافة اراك للزبل ديال بصاح. كازا كلها خنز ودابا ديرو دورة فاي حي من احياءها من السونتر حتى لاخر نقطة كاينين صور تدين هاد الشركة. الزبل بزاف وفبلايص كيدوزو منها بيضاوة. حدا الطوبيسات حدا الطاكسيات حدا الميترو.
تدبير هاد الشركة للزبل خالق مشكل فجماعات المدينة٬ رئيس جماعة سيدي مومن حميد بن غريضو قال فتصريح ليه باللي هاد الشركة اللي ما قدراتش دبر المرحلة الانتقالية ما كاين لاش تتقدم من بعد باش تستافد من عقد لتدبير النفايات. عطى ارقام صادمة. قال باللي وعدات باش تجيب 400 حاوية يالله جابو 100 باقية 300 ووعدو باش يجيبو 50 عامل يالله جابو 20 وباقي 30.
دابا بهاد الارقام كيقولو لبيضاوة “كون نقي”. كلشي احياء كازا فيها هاد لوسخ ماشي حي دون اخر وباراكا من لقوالب ونوضو تخدمو عوض تحملو المسؤولية لبيضاوة فمسؤولية ما قدرتوش عليها وديرو فيديوهات كتبينوهم باللي كيوسخو لمدينة.