سكوب. الياس العماري كان غادي يكون رئيس الحكومة فبلاصة بنعرفة. بنكيران وصلاتو رسالة: يا اما تقبلو ولا ياخدها البام =عدوك الياس

قبول عبد الاله بنكيران اعفاؤو من تشكيل الحكومة وتعيين بنعرفة فبلاصتو مازال ما عرفناش عليه خبار كثيرة. كل مرة كيخرج خبار. بنكيران بعد اعفاؤو وتكليف العثماني بتشكيل الحكومة الحالية ف2017 لعب دور كبير باش حزبو فالمجلس الوطني يقبل هاد الشي.
بنكيران دخل بكل قوتو باش حتى النقاشات ما تكونش. طبعا من بعد مشات الامور عكس ما كان يتوقع. كان يتوقع ان العثماني غادي على الاقل ما يقبلش دخول الاتحاد الاشتراكي للحكومة. طعنة كبيرة ما قدرش لحد الان يفهمها.
لكن علاش بنكيران بان متحمس وعاون العثماني يشكل حكومة؟ هاد الشي كيفسر رسالة توصل بها رئيس الحكومة السابق. رسالة مفادها وفق مصدر مقرب منه ل”كود” فيها: اما يكون تقبلو الوضع او تمشي الحكومة للاصالة والمعاصرة اللي كان جا الثاني وجاب 102 مقعد فمجلس النواب مقابل 125 جابها العدالة والتننمية فالحقيقة جابتها شخصية بنكيران.
وفق مصدر “كود” فان بنكيران تخلع من هاد الشي. عرف باللي ايلى خدات الاصالة والمعاصرة الحكومة ما تفارقش عليها واخا دوز 10 سنين. فهم باللي الياس العماري غادي ياخذ رئاسة الحكومة. المصدر اضاف ل”كود” “والمشكلة ان لمغاربة يدوزو سنوات مع حزب بحال البام اللي كتشوفو كيف داير اليوم وخاص سنوات اخرى باش نتخلصو من هاد التريكة كون وقعات. الكلفة كبيرة بزاف. عليها بنكيران قبل ودعم العثماني” يشرح مصدر “كود”.
واش هاد التهديد اللي قالوه ليه بعدوه حقيقة ولا غير فزاعة؟ هاد الشي يقدر يبان شي نهار. المهم اليوم فهمنا علاش بنكيران كان محروق فدعم العثماني واخا كلشي رجع ليه بمومزوي وامور خايبة.