عكس ما كيتوقع بعض متتبعي كرة القدم، سعيد الناصيري، رئيس الوداد غادي يستمر في بلاصتو كرئيس للعصبة الاحترافية لولاية الثانية. علاش، لأنه حتى واحد من رؤساء الفرق الوطنية ماقدم ترشيحو الى حد اليوم، نهار لخر، لوضع الترشيحات لدى الجامعة. الناصيري غادي يوضع لائحتو هاد اليوم بشكل رسمي، وهي الوحيدة لي غادي تكون في الجمع العام ديال العصبة الاحترافية في 15 شتنبر المقبل. الناصيري غادي يطير مجموعة من صحابو لي كانوا معاه في الولاية الاولى، وغادي بجيب رؤساء جداد، بحال عبد السلام بلقسور، رئيس نهضة الزمامرة وإسماعيل الحامعي رئيس المغرب الفاسي ونعيم مبارك من الكوكب المراكشي وعادل التويجر من سلا. وعلمت “كود”، أن الناصيري ما لقا حتى منافسة من شي حد، حتى جواد الزيات، رئيس الرجاء البيضاوي خوالو سيكتور لحقاش مبغاش يتشغل بالعصبة الاحترافية على حساب فرقتو. دابا واش الناصيري غادي يستافد من الأخطاء الكبيرة لي دار العام الماضي ويكون حاضر ناضر في جميع القصايا، ولا غادي يخلي الحامعة هي لي تسير العصبة بلاصتو بحال كيف كان من قبل. الوضع مختلف دابا، خاصة بعدما أكد فوزي لفجع، رئيس الجامعة في لقاء الصخيرات، على ضرورة أن يتحمل رؤساء العصب مسؤوليتهم في اتخاذ القرارات لي كاتهم الأندية ديالهم، ومايبقاوش معولين على الجامعة باش الدير كلشي.