الأفريكان أميريكان لي شدوه فالرباط ورحلوه لبني ملال عندو الزهر أن المغرب بلاد كيحتارم حقوق الإنسان ويكتفي بتنظيم سفريات سياحية للأجانب المقيمين بلا وراق، حيت كون شدوه البوليس ديال ميريكان كون قتلوه غير حيت كحل

كنظن فألفين وتسعود كنت كنبيع ونشري فحومة الشوك من بعد مكملت خدمتي وجمعت سلعتي سيفطتها مع الواليد ووقفت تما نيت نكمي واحد الكارو وكنتسنى واحد صاحبي، شوية وقف عليا القايد والمخازنية والمقدمين دايرين حملة، طلعت معاهم داوني لواحد الكوميسارية في ساحة التيران، هاد الساحة لي كانت بلاصة لممارسة مصارعة التيران ومن بعد تحولات لمكان للسهرات والإحتفالات، ولي كتعتابر معلمة تاريخية، مسؤولي طنجة بانتليهم انها صالحة تكون كوميسارية كيجمعو فيها الحراكة، حطوني القايد والمخازنية تما وزادو بحالهم يقلبو على شي فياج آخر، كنت انا وشي دراري، فديك الكوميسارية تسلمنا للبوليس وبداو كيعزلو فينا، لي عندو لاكارط ناسيونال على طنجة كيطلع فواحد الفاركونيط ديال نقل العمال، ولي عندو لاكارط على مدينة خرى كيدخلوه لواحد القاعة كبيرة وعامرة كيبقاو يتسناو الكيران لي كيديوهم يحطوهم فقنيطرة او يلوحوهم غير فالطريق ويرجعو، أنا داوني لكوميسارية العوامة دارو تحقيق الهوية طلقوني بحالي.
بزاف ديال الدراري داك الوقت لي مكانوش حراكة، كانو غير ولاد الداخل مقودة عليهم ها لي خدام فالبني ها لي فالمعامل كاريين فالاحياء الشعبية، ها لي خرج يجيب خبزة ولا شي جوج ماركيز حتى كيجمعوه ويصبحو لايحينو فالقنيطرة ولا حاطينو فالخرجة ديال العرايش، داك الساعة كانت الحملة على الحراكة في طنجة، وكانت طنجة عامرة بيهم، وملي كتبدى هاد الحملة مكاين غير جمع بنادم من الطرف، كاع لي معندوش لاكارط ديال طنجة ومعندوش وثائق ديال شي خدمة محترمة، وكانت مقودة عليه ومدربل في حالتو كانو كيهزوه يرحلوه، مغاربة نيت كيترحلو وسط المغرب من مدينة لمدينة بدعوى محاربة الهجرة السرية، وحيت مكان عندهم لا فايسبوك لا فيديوات ، القصص ديالهم مشات مع الواد الواد وبقاو يعاودوها غير لجواد.
الأفريكان أميريكان لي شدوه فالرباط ورحلوه لبني ملال عندو الزهر أن المغرب بلاد كيحتارم حقوق الإنسان ويكتفي بتنظيم سفريات سياحية للأجانب المقيمين بلا وراق، حيت كون شدوه البوليس ديال ميريكان كون قتلوه غير حيت كحل وفي أحسن الاحوال كان غادي يصبح مليوح برا الحدود في ظروف مزرية، ولكن حيت حنا بلاد كتحتارم حقوق الإنسان وفيها المساواة بين الاعراق والأقليات، فراه داوه ساراوه شوية، وهو في عوض يطلع يتفجج فعين اسردون ويرجع بحالو ناض كيشكي ويبكي فتويتر، بحال الى منعرف شنو طرا ليه، مافخباروش راه هاد الرحلات السياحية فالمغرب كيتنضمو حتى للمغاربة بأنفسهم مابقى غير الأجانب.