شروق الشلواطي: كنرفض راجل يضربني.. والطلاق ماشي عيب بل كيبين قوة المرا – فيديو

من بعد شهر على قضية طلاق ملكة جمال العرب شروق الشلواطي لي أكدات أن راجلها العراقي ضربها في الشهر الأول ديال الزواج وخانها وهما باقين مزوجين، خرجات في برنامج “عندي ما يفيد” في “تيلي ماروك” وسمحات بنشر تصويرة ديالها كتبان وهي مضروبة وعينها زرقة وفمها منفوخ.
الشلواطي لي الانستكرام كامل تبع قصة خلافها مع راجلها دوات وهي كتبكي على قصة الحكرة لي تعرضات ليها وهي في بلاد برانية (ألمانيا) بعدما ضربها ومد يدو عليها وقالت رسالة للنساء باش مايطيحوش فالذل: لي يضرب مرة يقدر يضرب 20 داكشي علاش اختاريت نمشي وأقرب وحدة كانت ليا هي ختي لي مستقرة في باريس.
وأكدات شروق أننا في 2019 هضرة بنادم مكتهمهاش ولو كان ضربها نهار قبل العرس كانت غادي تحبس كلشي. وأكدات أن الطلاق ماشي ضعف ولا عيب ولكن كيبين أن المرا قوية و أنها مكتخليش ورقة تتحكم فحياتها.
والحاجة لي بغات شروق كاع النساء يلتزمو بها هي يكونو مستقلات وعندهم مدخول مالي ديالهم وميعولوش على راجل في حياتهم لي يديرهم تحت السباط.