الزيات ماحملش الناصيري يرجع لرئاسة العصبة…رفض لائحتو بلا مايهضر فالجمع وانتقدو فالكواليس باش يكسب الجمهور

جواد الزيات، رئيس الرجاء البيضاوي، ماحملش يرجع سعيد الناصري لرئاسة العصبة الاحترافية مرة اخرى
الزيات هز يديه بجوج على التقريرين الادبي والمالي وبلا ما ينقاشهم، وما كان عندو حتى اعتراض عليهم.
الاعتراض الوحيد، لي كان عندو هو ضد اللائحة ديال الناصيري، أو ضد الرئيس نفسو.
من حق رئيس الرجاء البيضاوي يعبر على موقفوا بكل ديمقراطية وحرية، لأن هادشي لي خاص يكون في دولة الحق والقانون، لكن يهضر بعدا فالجمع العام ويقدم تبريراتو على سبب رفضو للناصيري ومن معه، ومن حقو كذلك يرفض يكون معاه، حينها غادي يكون الزيات كيحترم المؤسسات، لكن باش يسكت فالجمع العام ويصادق على التقريرين الادبي والمالي بلا حتا ملاحظة ويخرج لعند الصحافيين باش يهضر على سبب اعتراضو على اللائحة، فهدا كيستما التخربيق والنفاق بعينيه.
الزيات ما كانش كايهمو لائحة المكتب المديري أو الرئيس ديالها في حد داتو، لي هامو بالدرجة الأولى هو يكسب عطف جمهور الرجاء ويتسما أنه دار شي حاجة في الجمع العام وخا هو ما دار حتا وزة.
كان عليه يبين موقفو فالجمع العام ويواجه الناصيري فاص أفاص ما شي ينتقدو فالكواليس مع الصحافيين باش يدير البوز.
إلا كان الناصيري ما صالحش خاصنا نواجهوه بالحقيقة ونعارضوه علانية ونبرروا علاش هو ما صالحش للكرة المغربية ونقدموا اقتراحات بناءة ونديرو لائحة أخرى باش نافسوه. هدا هو عين العقل. يقدر يكسب الزيات الجمهور ديال الرجاء بهاد التصرف ديالو، لكن لي خاصو يعرف أنه خسر نفسو وقيمتو فالمؤسسة لي كاينتمي ليها. ما هكذا هم رؤساء الرجا الحقيقيين.