ضربات العصبة الاحترافية لكرة القدم ف الزيرو كل مبادئ المنافسة الشريفة و تكافؤ الفرص، و قررت برمجة مباراة قمة القسم الوطني الثاني بين شباب خنيفرة و شباب بنجرير نهار الأحد الجاي بالعشية علما أن الفريق الخنيفري تاتسناه بعدها بثلاث ايام مباراة الموسم برسم ربع نهاية كاس العرش ضد الدفاع الحسني الجديدي اللي غادي يكون مرتاح و شابع راحة بعدما تأجل ليه الماتش ضد بركان. لجنة البرمجة التابعة للعصبة الاحترافية، و بعدما حطمت رقم قياسي ف عدد المباريات المؤجلة، زادت نقطة سوداء لتاريخها العامر بالسواد، بهذا القرار المثير للريبة اللي غادي يخلي خنيفرة تلعب ماتش صعيب ف البطولة، ثم تشد الطريق مسافة طويلة باش تلعب مع دكالة ف تيرانهم، و كلشي هاذشي في ظرف 72 ساعة فقط، في الوقت اللي كان يمكن فيه تقديم ماتش السياكا ضد بنجرير ليوم الجمعة كيما تايتدار مع الفراقي المحظوظة اللي عندها ناس تايعرفو للتنوعير في كواليس العصبة و الجامعة على عكس السياكا اللي واخا الرئيس ديالها الجديد عضو بمكتب العصبة إلا انه واقيلا مازال حشمان و ماعرفش أو ماقدرش يقول للناصيري اللهم إن هذا منكر و حشومة تلعبونا جوج ماتشات صعاب ف 72 ساعة ف الوقت اللي الخصم ديالنا غادي يكون تايتسنانا في كامل جاهزيته البدنية بحكم استفادته من تأجيل ماتش البطولة. هاذ القرار اثار غضب جماهير السياكا اللي اتهموا المسؤولين عن الكرة بأنهم عطاو كاضو لا يقدر بثمن للجديدة باش تغلب خنيفرة اللي بدات تاتخلع الفراقي ديال القسم الاول من نهار قصات نهضة بركان، اللي هي حامل لقب كاس العرش، و زادت عليها أتلتيك زمامرة اللي كلشي تايضرب ليها الحساب من نهار خرجات الرجاء من لاكوب.
