ضجة كبيرة واقعة في اليوتوب ما بين مؤثرة والجدارمية.. ختها بغات تنتاحر بزيزوار وطيح الباطل على جدارمي

هاد المشاهير ديال انستكرام كيسحاب ليهم أن اللايفات سلاح كيحميهم وهو غير كيغرقهم وكيبين الكلاخ ديالهم. المؤثرة فاطمة الزهراء المعزي لي مشهورة ب”أم مهاب”، دارت لايف محيحة على جدارمي كيدير خدمتو. السيدة جبدات تلفون وطلقات لايف وبدات كتغوت وتصور في الدركي في الوقت لي أختها كانت كتهدد بالانتحار وقالت غادي تجبد زيزوار وتقطع عنقها ويمشي هو فيها.
المشكل في هاد لافير كاملة أنها طلقات لايف وقالت “وصلتو 2000 واحد كلشي يحط في اليوتوب باش ناخد حقي”، آشمن حق كتدوي عليه؟ مانعرفت. دارت الشوهة ليها ولختها، وبانت ماواعياش بخطورة التصرفات ديالها والحكرة لي بينات في حق الجدارمية، والجوقة لي جمعات وعرقلات حركة السير.
الجدارمية عندهم الكسوة فيها الكاميرا، ودابة خاصهم يجبدو الفيديو باش نشوفو هادشي كامل وكيفاش بدا وسالا، حيت هي حدفات اللايف من القناة ديالها.
ومن بعد ما دازت ساعتين، رجعات أم مهاب بلا حشمة بلا حيا كتقول لبنادم مسحو الفيديوهات من اليوتوب باش ماتخرجش للسيد على بلاصتو.
ولي معروف على هاد السيدة والفيديوهات ديالها لي مطليين فاليوتوب، انها مكتحترمش قانون السير، ديما مدير اللايفات وهي سايكة، وكتجاوب الناس زيد عليها مكدريش السمطة وولدها الصغير ديما موراها ومعرض للخطر.