المغاربة كايطرا ليهم فحال داك لي كان عايش لابس ماسك على وجهو حياتو كاملة و نهار حيدو كتاشف شحال وجهو بشع ! گاع داك الخيخ لي كان مخبي وسط الحيوط فالديور و الدروبة فرشاتو وسائل التواصل الاجتماعي

مؤخرا وقعو بزاف ديال الاحداث لي لعبو فيهم مواقع التواصل الاجتماعي دور كبير ! ديك البنت حنان لي تكرفص عليها واحد المجرم و قتلها، داك الطفل لي غتاصبوه ثلاتة ديال الشحوطة ! جرائم بشعة ! خلات عباد الله يستغربو من درجة الوحشية لي فشي ناس و الناس كاتلقاهم فالفايسبوك كايكتبو ” مابقا مايعجب” ” هادشي ولا كايخلع …”
هادشي من ديما كايخلع آ الحاجة ! المغرب من ديما فيه الجرائم البشعة و الوحشية ! و من ديما كايتعرضو فيه العيالات للتجنديخ و التكرفيص و الاغتصابات ! و ماشي غير العيالات ! ايتها كائن ضعيف غايطيح فيد شي مجرم راه غايطحنو و ماغايعقلش عليه، و لكن الطريقة باش الناس كايهضرو على الاجرام و المجرمين فحالا هادشي جديد علينا هي لي غريبة حيت الشيء الوحيد الجديد فهادشي كلو هوا التيليفونات بالكاميرا لي ولاو عباد الله كايصورو بيهم الجرائم ديالهم اما الجرائم بحد ذاتها راها كاينة من قديم الزمان !
التيليفونات و اللايفات و وسائل التواصل الاجتماعي عرات على الواقع المقود لي سنوات و الناس ساترينو وسط ديورهم ! التكرفيصة لي تعرضات ليها حنان تعرضو ليها و كايتعرضو ليها بنات بزاف فبلاد كاتجرم العلاقات الجنسية بين الراشدين خارج اطار الزواج يعني حتى القانون لي يحمي الانسان ماكاينش ! اما لي كايتعاطاو الدعارة هادوك اصلا كاتعتابرو مجرمات !خارجات عن القانون ! يعني لي غايشدهم و يتكرفص عليهم و يمرمدهم بصحتو و راحتو ماغايصورو منو تاخرية ! الشيء لي كايخلي جزء كبير من العيالات المغربيات فريسة سهلة للمجرمين و البسيكوباطات و مايقدوش يديكلاريو بيهم حيت ماغايصورو منهم والو.
هادشي كاين و كاين من ديما و غايبقا مادام المجتمع مقودة عليه و القوانين ماكاتحميش جميع المواطنين ، و مع انتشار وسائل التواصل الاجتماعي غانزيدو نتعراو و غانزيدو نشوفو وجوهنا الحقيقية فالمرايا ! الوجوه الحقيقية لي مخبعة مورا ديك الهضرة ديال المغرب مجتمع محافظ و كدا ، الأمن و الأمان و كدا ، حقوق الانسان و المرأة و كدا … و ديك الهضرة الغليضة لي حنا بعاد عليها بسنوات ضوئية!
ماعرفتش فين سمعت و لا قريت بلي المغرب لاحيدتي السقوفة ديال الديور و طليتي غاتشوف واحد البشاعة ماعمرك تتخايلها و يمكن گاع يبان ليك بنادم عايش فسبيطار ديال الحماق كبير غي مستور بين الحيوط و مغطينو السقوفة!
دابا بلا ماتحتاج تعري السقوفة و تحيد الحيوط ! القوادة ديال الحياة المغربية من اجرامها و كبتها و مشاكلها و عقدها و الخيخ ديالها كامل تقدر تشوفو لايف فاليوتوب.