لثاني مرة من نهار بدات.. نايضة على “mbc5” في الانترنت

نايض صداع جديد على قناة Mbc5 بعد بث فيلم “القلب الغارق” لي بانت فيه الممثلة فرح الفاسي مرات الممثل عمر لطفي في لقطات شبه عارية، وهادشي اعتبروه بعض المعلقين المغاربة ماشي حتال لهيه حيت كانو كيتفرجو مع عائلاتهم.
اللقطات اعتابروها بعض المغاربة لي عايشين في القرون الوسطى خدش للحياء، وناضو للقناة لي كيبان أنها باش دير البوز عن طريق العرا في الأفلام لي كدوز.
الانتقادات وصلات لعند فرح، وبعض المكلخين سبوها وعيروها بكلام مفيه ميتقال في اخر صورة حطات في انستكرام.
وكيف قلنا ملي ناض صداع على فيلم “حياة” لي واخد أفلام عالمية كثيرة، انه واخا عارفين ان المشروع كامل مبني على حاجة وحدة وهي فلوس البترول، والتقديم والبرامج مقتول، وديما ف"كود" كناكدو انهم داخلين بالفن باش ينشرو الجهل، الا ان هاد المرة جا الجهل من عند المتفرجين بحملة "شوهتنا وحدة". اه شوهتنا وحدة ولكن شوهة الكلاخ والتزمت ماشي العكس. كيتفرجو فهادشي بالتخبية ويغوتو ويستنكروه فمواقع التواصل.