البوليس غادي يتدخل ف “البيي” ديال الديربي…45 ألف هو ما لي يكونوا ف التيران

السلطات الأمنية ف الدار البيضاء عندها هم واحد دابا هو كيفاش غادي تنظم الديربي، لي غادي يجمع الرجاء البيضاوي بمنافسه التقليدي الوداد البيضاوي السبت المقبل بملعب مركب محمد الخامس في الدار البيضاء في ذهاب ثمن نهائي كأس محمد السادس للأندية العربية.
مصادر “كود” أكدت بلي البوليس قرر يتدخل في “البيي” ديال الماتش باش ما يخليش الرجاء البيضاوي, باعتباره المستقبل, يطبع تذاكر بزايد، أي أكثر من الطاقة الاستيعابية للملعب.
البوليس حدد عدد “البيي”، لي خاص تطبع، في 45 ألف، على أن يتم اقتناؤها سواء عبر الانترنيت، أو الشبابيك، لي غادي تخصص للسحب.
علاش البوليس غادي يدخل، لحقاش باغي بتفادي الفوضى ف الملعب والشغب لي يمكن يوقع إلا عمر التيران أكثر من القانون المسموح بيه.
اللجنة المنظمة والبوليس بداوا في إجراءاتهم الروتينية للتحضير للديربي، واتخاذ كافة التدابير الاحترازية لتفادي اي شغب وفوضى محتملين، خصوصا أن الجمهور عوال يحضر بكثافة من البيضاء وخارجها من أجل متابعة أطوار الديربي، لي كيتعتبر الأكثر تشويقا سواء على المستوى القاري أو العربي، وعندو مكانة كذلك مكانة على الصعيد العالمي.