حمد الله دار الشوهة.. ما بغاش يعطي لأمرابط يضرب بيلانتي واخا رغبو و”فابسبوكيون” نزلوا عليه – فيديو

عبد الرزاق حمد الله بين على أنانيتو ف ماتش النصر السعودي مع ابها ف الدوري السعودي، فاش ما بغاش يعطي لأمرابط يضرب بيلانتي.
عدسة الكاميرا بينات أمرابط كيطلب حمد الله باش يخليه يضرب بيلانتي ولكن حمد الله رفض وما صوقليش، وضرب بيلانتي وماركا.
هاد المشهد وقع لحمد الله مع المنتخب المغربي ضد أوغندا ف مراكش، فاش فيصل فجر ما بغاش يعطيه يضرب بيلانتي.
الفرق لي كان، هو أن حمد الله تقلق وغضب وكانت هاد الواقعة من بين الأسباب لي خلاتو يغادر معسكر المنتخب الوطني على بعد أيام قليلة من نهائيات كأس إفريقيا بمصر 2019.
لكن نور الدين أمرابط كمل الماتش واخا صدمو ولد بلادو، وما اشتكى ما دار تدوينة ولا حتا شي حاجة، وهذا هو الفرق بين لاعب هاوي ف دماغو ومحترف حقيقي.
أمرابط بغا يضرب بيلانتي ما شي لانه طامع يكون هداف، أو يحتاج من شد حد يساعدو باش يتألق هو دائما سبع ف التيران، لكن بغا فقط يدون اسمه في سجل هدافي هاد الماتش.
للاسف حمد الله نسى مشحال من أسيست عطاه أمرابط وخلاتو يماركي ويصبح الهداف.
نشطاء مواقع التواصل الاجتماعي ف “الفايسبوك” و”تويتر” نزلوا على حمد الله واعتبروه أناني، خصوصا أن الفيديو بين أمرابط كايزاوگ فيه. ومنهم من اعتبرو ما يصلحش للمنتخب الوطني وإلا جا غادي يخربق المجموعة بكل تأكيد.