فمناظرة قبل الانتخابات التشريعية الاسبانية. الصحرا غابت والمغرب حضر مع اليمين المتطرف ومع اليمين الكلاسيكي: الهجرة والمونديال

خلال مناظرة تلفزيونية دارت البارح الاثنين فالليل قبل الانتخابات التشريعية الجديدة الاسبانية اللي غادية تكون الاحد الجاي٬ غلب موضوع كاتالونيا.
هاد المناظرة اللي شارك فيها لاول مرة 5 زعماء احزاب فيهم اباسكال زعيم “بوس” الحزب اليميني المتطرف٬ بالاضافة الى بابلو كاسادو عن الحزب الشعبي وسانشيز عن حزب العمال الاشتراكي واينگليسياس عن اليسار المتطرف “بوديمون” وريبيرا عن “سيودودانوس”.
موضوع المغرب ثاروه منشطي هاد المناظرة باش سولو اباسكال على الاجراءات اللي كان قالها حزبو بخصوص لمغاربة فمليلية وسبتة. اباسكال ما بغاش يبين تطرفو قدام الصبليون. بان متردد ودافع على حدود بلادو وحمايتها بلا ما توصل بيه الجرأة يقول اللي قالو حزبو وزعماء حزبو فمليلية باش مشاو حتى هدرو على تهديد لمغاربة للصبليون. قال هاداك المتطرف باللي خاص الصبليون يلدو بزاف باش ما تغيرش الملامح الديموغرافية باسبانيا.
المغرب تجبد كذلك باش هدر سانشيز على التعاون مع المغرب بخصوص الهجرة فرد عليه كاسادو باللي باغي دير مونديال مع المغرب =كيهدر على الترشيح المشترك المغربي الاسباني لاحتضان كأس العالم 2030= وباللي هاد الشي باغي ديرو غير على قبال الهجرة.
قضية الصحرا ما كانش كاع، ما جبدها حد ولا داها فيها حد. هاد القضية كانت محورية فالنقاشات السياسية قبل سنوات وما يمكنش تكون شي مناظرة بلا ما تكون حاضرة. هاد المرة ما جبدوهاش بحال اخر مناظرة داروها 4 من هاد المرشحين 5 قبل اشهر.