قضية حمزة مون بيبي.. حوار ابتسام باطمة داز بالطليب والرغيب حيت سميتها مذكورة فالتحقيق مع شبكة الابتزاز والتشهير

سيمانة لي دازت، تم بث حلقة “followers” لي كتقدمها رباب أزماني مرات فريد غنام والضيفة كانت ابتسام باطمة، اخت دنيا باطمة.
التبركيكة لي جابت “كود” أن المشرفون على البرنامج وبعدما كمل تورناج رفضو يدوزو الحلقة ، والسبب أن ابتسام باطمة مذكورة في المحاضر ديال قضية عصابة “حمزة مون بيبي”، لي كيبتزو وكيشهرو بالناس والفنانين مقابل الفلوس.
رفض بث الحلقة نوض حالة في عائلة باطمة، ومصدر اكد ل”كود” ان ختها دنيا اتصلات بالمسؤولين لي كتربطها بهم علاقة قوية حيت كانو معاها من بداية نجاحها في “اراب ايدول”، بالطليب والرغيب باش دازت الحلقة بعدما أجلوها 2 سيمانات.
مصدر “كود” اضاف أن ابتسام كانت حطات الكواليس ديال التورناج والمتتبعين بقاو كيتسناو الحلقة امتى دوز، ولتفادي القيل والقال خصوصا أن القناة يالله كانت في مشكلة بعدما دوز عماد قطبي الميلودي كيدوي على ضرب النساء، فضلو يدوزو الحلقة.