خاص..الحكومة كتقلب على بديل عبيابة في مهمة الناطق الرسمي: أمكراز والرباح مرشحين للمنصب

علمت “كود” من مصادر مطلعة أن قادة الحكومة يبحثون عن “بروفيل” بديل عن حسن عبيابة، في مهمة الناطق الرسمي باسم الحكومة.
مصادر “كود” قالت بأن “مصطفى الرميد وزير العلاقات مع البرلمان رفض يشد مهمة الناطق الرسمي باسم الحكومة رغم أن سلفه في الوزارة مصطفى الخلفي كان مكلفا بمهمة الناطق الرسمي باسم الحكومة”.
الكوارث لي دار عبيابة ف التواصل، ولي كولشي غاضب منو، من وزراء واعلاميين وبرلمانيين، خلات العثماني وقادة بارزين ف البي جي دي يقلبو على بروفيل لهاد المنصب، خصوصا وأنهم باغين يبينو الاصلاحات لي دارو، وعارفين بلي عبيابة غايضر بيهم كثر ماينفع.
من بين المرشحين، الوزير الشاب محمد أمكراز، لي شاد وزارة التشغيل، ولي بين قدرة عالية ف التواصل من خلال مناقشة مشروع ميزانية وزارته بالبرلمان ومن خلال حتى الحضور ديالو فالجلسات العامة للبرلمان.
امكراز، وفق معطيات توصلت بها “كود”، مبغاش يشد منصب دقة لولا، وباغي يوجد مزيان، وغالبا هو لي غيكون ناطق رسمي باسم الحكومة.
مرش آخر هو عزيز رباح، وزير الطاقة، عندو قدرة تواصلية وكيعرف يروج للإنجازات، واخا يبدل مجهود ف علاقتو مع الصحاف فيما يتعلق ب”الأخبار” والحق في الوصول إلى المعلومات.
مصدر مقرب من العثماني، قال ل”كود” :”بلي نفي العثماني بأنه غادي يغير عبيابة نفي فيه السياسة، حيث غير مبغاش توقع أزمة جديدة ف الأغلبية ويدير خطوة مزروبة مور التعيين الملكي لحكومة الكفاءات، مبغاش يعطي ميساج بلي هادا لي تعين ماشي كفاءة”.