البوليس غادي يمشي مع جمهور الجيش للكازا.. الإدارة للأنصار: احترموا قوانين السير

جمهور الجيش الملكي ناوي يتنقل بكثرة للدار البيضاء، باش يشجع فريقه أمام الوداد البيضاوي نهار الأحد الجاي بملعب مركب محمد الخامس فالدار البيضاء، برسم مؤجل الدورة السابعة من منافسات البطولة.
البوليس قرر هاد المرة يمشي مع جمهور ديال الجيش باش يأمن الرحلة، ويتفادى تكرار الأحداث، لي وقعات في الهراويين قبل شهرين فاش مات مشجع عسكري، نتيجة أحداث الشغب.
مصدر “كود” أكد بلي العائلات ولات خايفة على ولادها من هاد الماتش، وربما هادشي غادي يؤثر على الحضور الجماهيري فماتش الكلاسيكو.
إدارة الجيش الملكي خرجات ببلاغ اليوم الجمعة تطالب الجمهور باتخاد الإجراءات اللازمة باش يتنقل بسلامة للدار البيضاء.
وأكد الفريق العسكري فبلاغ حطو على صفحته الرسمية بموقع التواصل الاجتماعي “فايسبوك” على ضرورة احترام قوانين السير وتفادي الازدحام على متن وسائل النقل، مشيرا إلى رغبته في أن تمر هذه المباراة في أجواء رياضية تليق بمستوى الفراقي بجوج واحترام للمبادئ والروح الرياضية العالية.