الصين دولة عظيمة وعندها مخططات للتمنية خاصة بكل إقليم والإسلام المتشدد كيعرقل هاد التنمية لذا فمن حقها أنها تحاربوا وتنقي أدمغة مواطينيها من عقيدة باغا ترجعهم قرون للوراء

المغاربة شعب ضد الأقليات في المغرب وفي نفس الوقت كيتضامنو مع كاع الأقليات المسلمة في العالم، ها الروهينغا ها الإيغور ها محجبات مارسيليا ها اللحايا ديال لندن، أي قرار خداتو شي دولة فالعالم باش تحارب الإسلام المتشدد بالضرورة كيعتابروه المغاربة وكاع مسلمي العالم هجوم مباشر على الإسلام حيت عارفينا عندنا أحسن دين في العالم حسب عادل الميلودي، بينما في الواقع الإسلام المتشدد بحالو بحال المسيحية المتشددة واليهودية وكاع العقائد المتشددة راه كيعرقلو مسيرة البشرية نحو الحضارة والتنمية.
وطبعا كاين أنظمة شمولية كتحارب كل ماهو مختلف سواء كان متشدد أو منفاتح كثر من القياس أو غير ماجاش على كانتها وصافي وهادشي طبعا مدان، ولكن للأسف المتضامن المغربي هو جد إنتقائي أو بل الأحرى جد موجه ولا رأي شخصي له، غير تابع جيلالة بالنافخ، سنوات واليمن لي مسلمين وولاد عمنا كاع كيتقصفو بالطائرات والمدافع وحملة عسكرية عليهم وتجويع وأمراض والأوبئة والألاف ماتوا، ومع ذلك عمرنا سمعنا شي واحد كيندب على اليمن تحترق، بينما غزة غير يسخف فيها شي واحد كتنوض فضيحة في البلاد ومسيرات مليونية وكولشي يسجب ويندد، وتصاور ديال أطفال من العالم مايتين في حروب أو كوارث طبيعية وكتلقاها منسوبة للعدوان على غزة، هذا مكيعنيش أن غزة مكيموتوش فيها الأطفال بسباب القصف ديال إسرائيل ولكن مكيموتوش فيها أطفال مسلمين قد لي قاتلين مسلمين وحدين خرين، غير العراق كل مرة يلقاو مقبرة جماعية إما من مخلفات صدام أو داعش أو الحشد الشعبي، ومع ذلك مكاين لا إدانة لا تضامن لا بكاء لا عويل.
الصين دولة عظيمة وشاسعة المساحة وعندها مخططات للتمنية خاصة بكل إقليم والإسلام المتشدد كيعرقل هاد التنمية لذا فمن حقها أنها تحاربوا وتنقي أدمغة مواطينيها من عقيدة باغا ترجعهم قرون للوراء، وهادشي الصين ماشي إنتقائية فيه لدرجة أنها تختار المسلمين فقط دون غيرهم، حيت راه فيها مسلمين من أقلية أخرى وعايشين بيخير وراه شركاتهم فالتنمية وجمعاتهم من الجبال وبنات ليهم مدن بمدارس ومستشفيات ودارت ليهم مزارع ديال الكروم لإنتاج الروج خدامين فيها بيخير وعلى خير، أي مغربي مثلا كان عندو حانوت فيه الصاكة وخدام بيخير وعندو واحد ولدو كيعاونو فيه وجزء من المشروع، جا واحد النهار بدا عليه خاص نحيدو الكارو حرام خاص نحيدو كوكا ديال ليهود خاص نحيدو اولويز خاص خاص، واش منطقيا يقبل انه فالساعات لي يكون مقابل هو مايبيعش داكشي ولي غادي يتسبب فالكساد او يجري عليه وتهني السوق، طبعا غادي يجري عليه، إيوا راه هادشي لي دايرة الصين في عوض تجري على الإيغور راه كتديرليهم إعادة التأهيل باش يوليو كائنات قابلة للتحضر وتخلصهم من عقيدة القرون الوسطى.