المغربي كائن مامسوفليش معندو خرقة للمرقة، وهادشي فأي حاجة وماشي غير فالإحتجاجات أو النضالات، وهادشي لي وقع مع هاد الحملة ديال المقاطعة اللخرة ، ولي دغية بدا الصدى ديالها كيخفت، وتحولات من مقاطعة لمنتوجات محددة بالظبط لتصفية حسابات مع موالين الماركات

كي العادة المغاربة معندهمش السوفل ، وكيما خرجو نهار عشرين فبراير بلآلاف من بعد بقاو غادين وكيقلوا حتى مابقا خرج تاحد، هاكاك من بعد مع أي حراك أو إحتجاج أو حركة ، حتى الأحزاب المغربية معندهاش السوفل ودغية داك الزخم والجهد كيمشي ، بحال المنتخب المغربي شحال هادي ديما تلقاه لاعب الجولة اللولة مزيان والتانية خاري فالطاس ، هاكة داير تكوين المغربي كائن مامسوفليش معندو خرقة للمرقة ، وهادشي فأي حاجة وماشي غير فالإحتجاجات أو النضالات ، وهادشي لي وقع مع هاد الحملة ديال المقاطعة اللخرة ، ولي دغية بدا الصدى ديالها كيخفت ، وتحولات من مقاطعة لمنتوجات محددة بالظبط لتصفية حسابات مع موالين الماركات ، ولإتهامات للناس لي ماقاطعوش بالخيانة.
وكي العادة غادا تدوز مدة وترجع الأمور لمجاريها ، ودانون راه شركة عالمية من العشرة الكبار فالعالم فالأغذية ، صعيب تتقاص واخا يقاطعو المغاربة مية عام ، غير هو فنفس الوقت راه مقاطعتها ماشي خيانة للوطن ، حيث الوطن عمرو مكان شركة فرنسية عابرة للقارات، الوطن راه هنا ماشي لهيه ، وبحال هاد الهدرة كتزيد تحقد الناس ، لي محركهم أصلا هو حقدهم على أغنياء هاد البلاد وكيفاش مستافدين منها وثرواتهم كتراكم وهوما عايشين بلا مستقبل بلا حاضر، وماواصلهم من الحلوة حتى الفتات ، ومع ذلك يجي واحد ماعارفها باش مسقية ويبدى يمن على المغاربة ، ويعاتبر المقاطعة لشركة فرنسية خيانة للوطن ، هاد الهدرة كون قالها في فرنسا كون جراو عليه ، ولكن هنا سايبة الوقت لبحال هاد التصريحات وبحال هاد الطلقات والسلوقيات، وحتى بحال هاد الهدرة راه سبب كافي للمقاطعة واخا تكون كاع مسيسة وماعارفينش شكون من وراها.
سيمانة قبل مايكونوا المغاربة مضامنين مع ولاد الشعب ومقاطعين ، كانو دايرين البوز بالمغني البولماني والجملة لي كانت كتردد ديما هي هذا مغني ولد الشعب عاونوه يوصل ، ولد الشعب عند المغاربة هي فقير مقودة عليه ، والشعب هوما المقودة عليهم ، أما لي بيخير عليه فراه مابقاش من الشعب ولا مباشرة من كروش الحرام، بحال الى مكايناش شي منطقة وسط ، فين يمكن يكون للواحد ولد الشعب ولكن لاباس عليه بحال أخنوش وبحال بزاف ديال الأثرياء المغاربة لي ولاد الشعب ولاباس عليهم ، الفلوس مكتحيدش التمغرابيت للواحد ، والشعب راه هو المغاربة بفقرائه ومرفحيه ، وهاد المفهوم ديال ولاد الشعب راه هو لي مخلينا هاكة لي جا يركب ويستغل فالشعب حيث ماعارفش راسو حتى شناهو ، والدليل ها الشعب تجر فحملة مقاطعة مسيسة الهدف منها النيل من أشخاص معينين تجر فيها الشعب كنوع من النضال ورد الإعتبار .