"كود" تنفرد بنشر مذكرات محمد سقراط /الحلقة 17/. الحمام هو اخطر قنت فالحبس. باش دخلت ليه بعد تردد اكتشفت غالبية اجساد الحباسة موشومة ومخططة, وكانت بحال بطاقة تعريف على المسار الإجرامي للواحد وأنا مافيا حتى قمشة. حسيت بالنقص وقررت نوشم

اليوم كان أول نهار غادي نمشي فيه للحمام ديال الحبس , من نهار جيت وأنا كندوش غي فالطواليط ديال الشامبري , فاللول مزعمتش حيث حسب الأفلام الحمام هو أخطر قنت فالحبس, زعمني إبراهيم وأنبت أمري لله و مشينا, الحمام ديال الحبس كان عبارة عن غرفة كبيرة قد الشامبري وفالنص ديالها كاين سبعة ديال الرشاشات خمسة فيهم هوما لي خدامين, وعلى كل رشاشة كتلقى صف ديال البشر واحد ورا واحد, وكاين لي مكيشدش الصف ومعندك متقوليه ومتقدرش تهدر معاه أصلا, و كاين لي كيشد رشاشة هو وعشرانو كيتناوبوا عليها بيناتهم وكاين الشعب لي غي الى وصل للرشاشة وفزك بشوية ديال الما راه مابحالو حد , وكاين أيها الناس لي مكيجيوش للجمام أصلا حيث ميقدوش عليه, وماغاديش يتحمحموا على خاطرهم
كتدخل كتدير حوايجك فميكة كتحطهم فالقنت وكتعلق المشطة والشامبوان والكيس فالكيلوط ديالك, حيث خاص تكون ناضي حسكة, أنا داكشي لي شفت إبراهيم كيديرو كندير بحالو , هو حباس معروف فالحبس وكابر فيه, غي وقف جيهة الرشاشات عيطليه واحد عشيرو كان شاد وحدة ,- زيد أخا إبراهيم -, دخل إبراهيم ديريكت لتحت الرشاشة بلا صف بلا والو, تشلبخ بالما مزيان و عيطليا , تزرعت حتى أنا , ملي كنت غادي نتخشى تحت الرشاشة كنت مخلوع عنداك يحتج شي واحد, وفنفس الوقت حشمان, حيث مجاتش بنادم شاد الصف و تجي نتا تخشى , كنت كنتشلبخ بالما ومكنشوفش جيهة هادوك لي واقفين, ماقادرش , و هو ينكر عليا واحد : يالله أخا واش حنا منعوموش ولا كيفاش ... ديك ساعة جمعت ملامح وجهي وخسرتهم على قد المستطاع ورديت عليه : هانا أعشيري دقيقة ونحيد راه غي تفيزيكة ,......
أغلب الأجساد كانت موشومة ومخططة, وكانت بحال بطاقة تعريف على المسار الإجرامي للواحد ,وأنا مافيا حتى قمشة سوى جوج ضربات مكبارش, وحدة ربعة ديال الغرزات ووحدة جوج, والتانية مابقاتش كتبان بزاف كاع, وبلا وشامات , حسيت بالنقص وحسيت براسي باينة فيا بوجادي, وقررت أنه غادي نوشم فأقرب فرصة باش نبان قديم فالشموتية .
خرجات التحميمة على خير , مشيت للتيليفون , دابا أنا عارف راسي راه غادي ندوز وقت لابأس به فهاد الحفرة, إذن خاص نبدى نوجد أموري و نقادها برة , دورت لجيهان , حيث كان أغلب أصدقائنا مشتركين, ويمكنليها تجيب ليا أي نمرة بغيتها ديال شي واحد, وحيث توحشتها وتوحشت نهدر معاها وكعادتها جاوباتني و هي ضاحكة :
_ تكونبتي فهادي أمسخوط الواليدين .
_أودي دابا طاحت الورقة مانافعة ندامة , آش خبارك نتي لاباس عليك بيخير ؟
_ بيخير بيخير , توحشتك القرد .
_ كي داير الفايسبوك بلا بيا .
ضحكات بالجهد, وكانت عندها واحد الضحكة عجيبة بلا صوت, ملي كتضحك كيتقطع الصوت ديالها كتبانليك غي حالة فمها وبحال الى قاجها شي واحد, حتى كتقرب تسالي الضحكة عاد كتدير شي صوت خفيف , وفالتيليفون كانت ملي كتضحك كيجبليا الله غي تقطع الخط أو مشا الريزو , والسيدة راها غي كتضحك
_ واش نتا دابا فالفايسبوك شوف غي حريرتك بعدا باش عتفكها,كيداير نتا تما كيداير الجو .
بيخير بيخير بحال المسيرة أو حسن كاع, كولشي كاين ناقصة غي نتي , شوفي غادا تدبري ليا فالنمرة ديال حميد زيد و هشام فهمي و سلمي ليا على الدراري و شوفي قاديليا شي إم بي 3 تكون شاخدة راك عارفة آش كنتصنت, وكثري من الهارد, و عنداك تنساي الميوز والبلاسيبو والبيكسيز وأيرون مايدن وريد هوت شيلي بيبرز و بيث هارت وكاري مور ونينا سيمون وإيطا جيمس و ميطاليكا طبعا ,المهم راك عارفة آش كاين, قادي شي إم بي 3 تكون على ذوقك تنسيني فالحبس
_ تهلى فراسك أبوراس راك بقيتي فيا ,واخا هو الصراحة أحسن بلاصة تجي معاك نتا هي الحبس