تعنيف وتخلف وعاش الشعب.. “كَود” جمعات ليكم 4 أكثر شخصيات دارت البوز في 2019

كيف ديما، ملي كيقرب يخرج العام الحالي واستقبال العام الجديد، كنديرو حصيلة ديال الأحداث لي ماركات السنة ولي لقات تفاعل كبير في مواقع التواصل الاجتماعي وحركات المسؤولين باش يتدخلو.
نجاة الوافي وسعيد خلاف
شهر يوليوز ومع بداية الصيف، تفركَعات قضية الممثلة نجاة الوافي والمخرج سعيد خلاف لي شدوهم وسط دار ديال الكرا في كازا بتهمة الخيانة الزوجية لي رفعها عليها راجلها.
القضية حضات بمتابعة إعلامية كبيرة، والممثلة نكرات الخيانة الزوجية وأكدات أنها كتلاقا مع المخرج في البرطمة في گوتيي باش يدويو على الاعمال الفنية لي كتشارك فيها، لكن راجلها قدم كثر من 60 تصويرة للمحكمة قال أنها كتأكد أن الأمر فيه خيانة زوجية.
نجاة مزوجة من رجل أعمال مستقر في ميريكان هادي عامين وقبل ما يشدوها البوليس بشهر ونص كانت دخلات للمغرب وهنا راجلها شك فيها ونسق مع صديق ديالو باش يتبعها ويحضيها ويجمع الدلائل ضدها.
في شهر شتنبر المحكمة قررات إسقاط جنحة الخيانة الزوجية لانعدام ثبوت الفعل طبقا للمادة 493 من القانون الجنائي المغربي، ولكن تابعتها بالتحريض على الدعارة.
القضية جبدات نقاش كبير على الحريات الفردية وضرورة عدم تدخل الدولة فحياة الناس الشخصية. شي يخون شي كاع، سوق الكوبل هداك، داكشي خاص يبقى بيناتهم.
عادل الميلودي وتعنيف العيالات
المغني لي كيقدم راسو سفير الأغنية المغربية نقدرو نقولو هو لي كان نجم هاد العام من حيث “الباد بوز” او ما يسمى بال”البوز السلبي”، حيت لي جا في فمو كيطلقو بلاما يوزن كلامو، وبين على تخلف كبير.
في عام واحد وفي أشهر متقاربة خرج بتصريحات ميزوجين بعدما قال “لي ماكيضربش مراتو ماشي راجل”. كلامو لي جا في قناة تلفزية ضرب دورة في العالم والصحافة العالمية دواو عليه وانتاقدوه وخرج هو بتوضيح ملاوط كيدخل ويخرج في الهضرة، مع العلم انه ديما كيعترف بأنه كيضرب مراتو بكل برودة، وهي قابلة!
من بعد الجدل الكبير الهاكا دخلات على الخط وقررات وقف بث برنامج "Kotbi Tonight" لي دوز تصريحات الميلودي لمدة ثلاثة أسابيع، واعتبرات كلامو كيمثل خروقات متعلقة بمناهضة العنف ضد المرأة وبالمسؤولية التحريرية وبواجب التحكم في البث.
عادل الميلودي مُكرر!
ماجات فين دوز قضية العنف ضد المرأة حتى خرجو بنت وولد كيقدمو راسهم في الاعلام أنهم ولاد الميلودي وماباغيين منو والو من غير أنه يعتارف بيهم.
طبعا الميلودي لي عندو طريقة غير حضارية في التعبير عن رأيو ناض ليهم بالسبان وتخصار الهضرة من الحزام التحت وصفهم بالحيوانات والكلاب ووصف مهم بالعاهرة، ودار الحمية هو ومراتو إيمان باش يجاوبو الدراري لي قالو باغين النسب فقط ومطامعينش فيه نهائيا.
من أسابيع من الهضرة والمعاطية، الدراري حطو دعوى في المحكمة وفي الجلسة الأولى الناس استقبلو الميلودي بالسبان وحيحو عليه ودارو ليه الشوهة.
في الجلسة الثانية خرج الميلودي كيدوي وقال ربما البنت تقدر تكون بنتو لأنه مارس الجنس مع ماماها شحال هادي مقابل 70 درهم.
ماجا فين هاد الهضرة تنسى حتى قرقبو عليه البوليس هو ومراتو بتهمة الضرب والجرح بعدما تضاربو مع مغني كان مع مراتو وتقدم بشكاية وحط شهادة طبية كتبين مدة العجز ديالهم.
الشيخة الطراكس.. تخلف وتناقض
وباش مانبعدوش بزاف. الشخصية الرابعة لي دارت البوز السلبي هاد العام هي الشيخة الطراكس لي كانت نجمة فيديو كليب الميلودي نيت “الخلوفة”، السيدة تصريحاتها كاملة كتخليها محط انتقاد.
وقالت فاطمة الزهراء مؤخرا ان المرا هي المؤخرة، واضافت: “شكون ماكتعجبوش الترمة، وكلشي كيموت عليها ولي ماكتعجبوش ماشي مغربي”، السيدة طيحات من المرا وشيئاتها. الا جينا على هضرة فاطمة الزهراء مغادينش نبقاو نقيمو العيالات بخدمتهم وذكاءهم وشنو ساويات في المجتمع، غادي نعتابروهم جسد وصافي.
الكَناوي وولد الكَرية ولزعر وأغنية “عاش الشعب”
من بين الأسماء لي خلقات الجدل هوما الروابة ولد الگرية والگناوي ولزعر لي دارو أغنية “عاش الشعب” لي شدات الطوندوس لأسابيع طويلة وحققات ملايين المشاهدات.
في الأسبوع الأول خرج ولد الكرية كيقول ان البوليس كيقلبو عليهم حيت الأغنية كانت مستفزة وفيها كلام ماشي في محلو. ومن بعد الرابور الكناوي تشد وتضرب بعام ديال الحبس لكن لي مؤكد أن الأمر ماكان عندو علاقة بالأغنية المثيرة للجدل، ولكن بلايف دارو كيسب فيه المؤسسة الأمنية.
بزاف ديال الجدل رافق الأغنية وكانت ردود فعل رسمية وسياسية من الحكومة ووزراء وأحزاب.