قضية الرجاء البيضاوي والجامعة غادية وكتكبر بعد ساعات قليلة من الماتش، اللي غادي يجمع مولودية وجدة والرجاء البيضاوي اليوم السبت بملعب مصطفى تشاكر بالبليدة يرسم ذهاب ربع نهائي كأس محمد السادس للأندية الأبطال. من بعدما حاولات الجامعة تلقى الحل للرجاء باش يرجع من بعد الماتش مباشرة، وبالتالي يتفادى اعتدارو أمام الدفاع الحسني الجديدي نهار الثلاث جاي، برسم مؤجل الدورة التاسعة من منافسات البطولة، قرر الرجاء التصعيد. الجامعة أكدت أنها غادي تخصص 80 مليون للرجاء البيضاوي، باش يكري طيارة خاصة وهادشي كاديرو گاع مع الفراقي، لي كيشاركوا في المسابقات الخارجية، إضافة إلى 30 تذكرة فالطيارة و30 شامبر في الأوطيل. رغم هادشي لي دارت الجامعة مع الرجا، إلا أن ناطقه الرسمي سعيد وهبي أكد بلي الطيارة الخاصة مجرد هضرة خاوية، وان فريقو ما غاديش يرجع للمغرب حتى يلعب كونتر شبيبة القبائل الجزائري نهار 10 فهاد الشهر. وهبي زاد أكد أن مسؤولي الرجا ما توصلوش بشي مقترح سميتو الطيارة الخاصة. مصدر مسؤول أكد ل”كود”، أن ممثل الرجاء وقع على محضر اجتماع، لي تقرر فيه عدم تأجيل ماتش الرجاء والدفاع الجديدي، ما شي على لائحة الحضور، كما يحاول البعض تمويه الرأي العام الرياضي. واضاف المسؤول نفسه أن الجامعة كتخصص 80 مليون لكل فريق مغربي والرجا إلا بغا طيارة خاصة ما على مسؤوليه إلا يتصلوا المدير المالي ديال الجامعة.