گال ليك بنعرفة حكومة الكفاءات. وشوفو اجتماع شي وزيرة اسمها بوشارب غير مع عامل وها كيفاش الوزارة براسها مطلعة بالعامل وبينات لوزيرة بطريقة فشي شكل

دابا بنعرفة كذب علينا. قال للمغاربة غادي يجيب لينا حكومة الكفاءات. بانت الكفاءة العبقرية ديال الناطق الرسمي باسم حكومتو. يعني التوجيهة ديال الحكومة بينات على هاد الكفاءة. قودها وقودها وقودها. وباش بغاو يسولو بنعرفة على هاد الوزير اللي من حزب الاتحاد الدستوري قال ليهم ما تسولونيش عليه.
ماشي غير هو اللي ماشي كفاءة. كاينة سيدة من الحركة الشعبية هي مازال ما مصدقاش انها وزيرة لوزارة كبيرة ومهمة وهي إعداد التراب الوطني والتعمير والإسكان وسياسة المدينة يتعلق الامر بنزهة بوشارب.
هاد السيدة دارت اجتماع البارح فالحسيمة سماتو “اجتماع عمل لتتبع ومواكبة المشاريع المبرمجة بمخطط التنمية المجالية لإقليم الحسيمة” الحسيمة منارة المتوسط”. اللي ترأسو فالحقيقة ماشي هي الوزيرة بل العامل شوراق.
باش وزيرة دير اجتماع خاصها والي الجهة ماشي عامل الاقليم. خصوصا هاد المشروع اللي خرج منو حراك الريف وتشدو فيه زعماء ديالو وضربو ب20 عام ووقع زلزال سياسي وطيح وزراء كثار ومنع اخرين ياخدو مناصب مستقبلا. هاد الشي كلو خاص الاجتماع يكون فيه الوالي والوزيرة ترأسو ماشي يكون فيه العامل وهاد الاخير هو اللي كيبان فالصور رئيسو.
فالصور اللي نشراتها الصفحة الرسمية للوزارة ماشي حد اخر كيبان العامل شوراق هو الكل فالكل. السيدة ضيفة وصافي. ما كتهدر. ما كتكون فاللول. شوفو حتى فالگلسة فين باركة وفين بارك العامل. هاد الشي دارتو هي وفرحانة بيه وكتكومينيكي عليه.
باراكا من العبث. الوزير راه اهم من الوالي ما بالكم بعامل. باش تشوف هاد الصور تعرف علاش خرجو ناس الريف وخرجو مواطنين اخرين فالبلاد للاحتجاج.
اش من مشروع تنموي يقدر يكون فالبلاد مع صور بحال هادي.