بيت الذاكرة” ضربة معلم دارها محمد السادس. جاوب بيها ميريكان للي كانت باغية تلصق ليه يتلاقى بنتنياهو

الامريكيون ضغطو على المغرب باش يتلاقى الملك برئيس وزراء اسرائيل بنيامين نتانياهو. وزير خارجيتهم بومبيو باش زارنا مؤخرا كان لهاد الغاية واخا من بعد لا هما لا لمغاربة بغاو يقولوها علانية وبقاو كيدخلو ويخرجو فالهدرة.
اسرائيليون من اصول مغاربة كانو ضد هاد اللقاء حقاش عارفين الكلفة ديالو. دابا المغرب رد على هاد الشي بطريقتو. هاد السيمانا تم فالصويرة تدشين “بيت الذاكرة” ومشاريع اخرى كلها كتهم اليهود لمغاربة. حضرات اسماء كثيرة من اليهود المغاربة يمكن غالبيتهم عندو جواز السفر الاسرائيلي. كان اللقاء زوين حميمي سالى بعشا دارو الملك وترأسو اهم مستشار عندو اللي هو فؤاد عالي الهمة. كلها اشارات باينة باللي المغرب ما محتاجش لا امريكا لا غيرها باش يكون عندو قنوات اتصال باسرائيل. لسبب بسيط ان عدد كبير من اليهود المغاربة عايشين تماك ونقلو تقاليدهم وعاداتهم المغربية تماك وبقات العلاقة مع البلاد. فيهم شخصيات كبيرة وفيهم 3 داو جائرة نوبل فميادين مختلفة وفيهم اللي وصل لاعلى المناصب تماك.
الرئيس الاسرائيلي براسو رسل رسالة شكر الملك علي تدشين بيت الذاكرة” وقال ليك "نودّ أن نعبّر لجلالتكم عن أسمى آيات الشّكر والامتنان لحرصكم على الحفاظ على روابط الألفة والوُدّ مع أبناء الطّائفة اليهوديّة، وذلك اقتداءً بنهج آبائكم، فانتم خير خلف لخير سلف".
يعني هنا المغرب كيقول باللي هو ماشي هادوك الدول الاخرى. علاقتو ما مبنياش على المصالح فقط راه اكثر تركيب. راه فيها التاريخ وفيها الثقافة وفيها الحضارة.
ازولاي اللي شرف على هاداك النشاط طلع ذكي بزاف. نجح باش يجي حضور مهم ووازن ومتنوع فيه 27 شخصية من يهود المغرب فالعالم. نجح باش يعطي صورة مغرب مختلف متنوع متعدد. هاد الشي كولو مزيان غير خاص المغرب يوظفو اكثر. يخدمو فسياسيتو الخارجية.