علاش الدولة المغربية منافقة؟ كتقلب على اسرائيل عبر المنظمات اليهودية باش يساعدوه فقضايا كبيرة نهار تكون القضية قاصحة وسياسييه كيلعبو البطولة باش يحضر اسرائيلي لنشاط هاد الدولة عضو فيه

هاد الحيحة اللي دارت على عمير بيريز ولد بجعد اللي من اشهر سياسيي اسرائيل دابا من قبل شي نواب فمجلس المستشارين عبثية وكتبين انتهازية سياسية وشعبوية خاوية. علاش حقاش المغرب فاي وقت كيحصل فقضية كبيرة كيخرج كاع الاسلحة الديلوماسية ديالو. هادي طبيعية ومن ضمن هاد الاسلحة كاين اليهود من اصل مغربي. كلهم او غالبيتهم خاصة المؤثرين فالسياسيات الدولية كيدافعو على اسرائيل وكيدعموها وكثير منهم حامل للجنسية ديالها. الدولة فالتخبية وهذا من حقها كتشوف من اولاد لبلاد ولكن وفق ما سبق ان حكى ل"كود" مسؤول كيعرف مزيان موازين القوى في واشنطن ان جواب هاد اليهود كيكون فاحايين "كيفاش طلبو منا نساعدوكم وندعموكم وبلادكم ما كيدير والو لاسرائيل بل ماشي غير ما كديرش كتاخد مواقف ضدها"
هاديك الساعة كيرسل السفراء والوسطاء اللي عندهم علاقة مباشرة مع اسرائيل وكيتحرك وكيدير اليدين والرجلين باش يربح دعم هاد الفئة اللي معروفة فارتباطاتها.
دابا هاد الناس ديال الكونفدرالية الديموقراطية للشغل اللي جا للبرلمان ونسف اجتماع دايراه الجمعية البرلمانية للبحر الابيض المتوسط مع منظمة التجارة العالمية٬ علاش ما يطلبش من المغرب ما يبقاش مع هاد المنظمة وكل المنظمات اللي فيهم اسرائيل ونعيشو فقوقعة ونسدو عليها باش سيادتو يرتاح. هاد الشي خطير وثمنو غادي يكون كبير. كبير مع المنظمين اللي خداو صورة على بلاد كتكذب على العالم وكتقول التفتح وقبول الاخر وووو وعلى الديبلوماسية الموازية اللي كلشي كيهدر عليها. واش هاد الديبلوماسية كدار بالدفاع على البلاد ولا على شي بلاد خرا. راه الدفاع على البلاد ماشي غير شعارات راه اتصالات وقنوات وتأثير داخل منظمات اقليمية ودولية. بهاد التصرف هاد الناس ساؤوا للمغرب ماشي دافعو على فلسطين. حقاش هادي عام راها ناضت شي جمعية فهاد البلاد اللي عاطيها المغرب بزاف ودافعت على الشعب الصحراوي، هاد الشي ما عمر اسرائيل دارتو وهي بلاد ديموقراطية وفيها التنوع. المغرب مازال ما فهمتش شعار سبق للهمة قالو "تازة قبل غزة" وايلى بغيتو تازة دافعو عليها وما تعزلوش لبلاد وتضعفوها ديبلوماسيا