أوشن ما عندوش مع الأطر المغربية.. جاب ولد بلادو وعين صحابو فالمنتخبات الوطنية

الويلزي روبيرت اوشن ما عندوش مع الاطر المغربية، واخا فوزي لقجع، رئيس الجامعة الملكية المغربية لكرة القدم ألح عليه، باش يجيب الأطر المغربية للإدارة التقنية الوطنية.
هاد المرة جاب ولد بلادو نيل واردن وعينو مدير تقني لكرة القدم القاعدية.
ويبدو هاد الخطوة قام بها باش يقطع الطريق على الأطر الوطنية، بحال بادو الزاكي وفتحي جمال ورشيد الطاوسي.
الويلزي اوشن قرر يعين مدربين اجانب للمنتخبات الوطنية، باستثناء المغربي طارق مختاش، اللي عينو مدرب ديال المنتخب الوطني أقل من 15 سنة.
باقي المدربين الآخرين كلهم أحانب، إذ عين الإسباني سيرجيو بييرناس مدرب المنتخب الوطني أقل من 17 سنة والفرنسي بيرناند سيموندي مدرب المنتخب الوطني أقل من 23 سنة والبرتغالي جواو أروزو مدرب المنتخب أقل من 20 سنة.
الويلزي أوشن مازال ماحسمش فمصير الزاكي والطاوسي وفتحي جمال، ومن المنتظر أن يعقد ندوة صحافية، باش يعلن رسميا على الأطر، اللي غادي تخدم معاه في الإدارة التقنية.