مغاربة كاعيين من برنامج “ستاند آب” بسبب خسارة “السرجاني” اللي نوضو عليه حرب مشجعي الراجا حيت ديكلارا انه ودادي.. ومصدر ل”كود”: البرنامج غير مسؤول على هادشي.. الجمهور اللي كيختار

نتاقدوا مجموعة من النشطاء على موقع التواصل الاجتماعي “فيسبوك” حصول حليم صابر على لقب الموسم الرابع لبرنامج “ستاند آب”، واعتبروا باللي شرف السرجاني هو اللي كيستحق لقب هذا الموسم عن جدارة.
الإعلامي عبد الجليل الدريوش قال فهذ الصدد، فتدوينة ليه أرفقها بصورة السرجاني، باللي “الفوز ممكن خداه صابر من جهة ديال التعاطف، وكلنا كنعرفوا اللي يستاحق هو اللي كايخدم ماشي اللي ربح على حساب الظروف ديالو، وكلشي عندو ظروف الله يحسن العوان”، على حد تعبيرو.
على غرار الدريوش، مجموعة من المعلقين تأسفوا لعدم فوز السرجاني باللقب، على الرغم من موهبتو الكبيرة ف”التكلم البطني” وتقليد الأصوات، أحدهم قال: “فعلا شرف السرجاني قدم عرضا محبوكا صوتا وأداءا في جميع المراحل وجميع الشخصيات، لقد أخذنا من عالم البشر إلى عالم الحيوان.. أستغرب عدم فوزه”، وقال آخر: “جميعنا رشحنا السرجاني صاحب الفكاهة الهادفة والكلمة الموزونة، لكن ربما غلبت المغاربة العاطفة، وربما حسابات خاصة للبعض”.
وفاتصال “كود” مع مصدر فلجنة تحكيم البرنامج للتعليق على الموضوع، قال بللي اللجنة غير مسؤولة عن اختيار صاحب لقب البرنامج، وإنما الجمهور اللي كيختاروا عن طريق التصويت عبر رسالة SMS.
من جهة أخرى، كانوا بعض مشجعي الرجاء البيضاوي شنو حملة شرسة ضد شرف على مجموعة من الصفحات بعدما علن على أنه ودادي، وقرروا باش يصوتو ضدو باش مايربحش.
وللإشارة فالسرجاني يتقن فن التكلم البطني “la ventriloquie”، وقدر على أنه يزرع الروح فنونوس على شكل قرد سماه “درويشتي”، ويرجو كيهضر ويتواصل، وهي الحاجة اللي عجبات الجمهور بزاف وخلاتهم يشجعو السرجاني.