فضيحة حكم مباراة الديربي الفاسي نوضات الروينة.. رئيس الماص ل”كود”: غاديّين للقضاء

فضيحة “الديربي الفاسي” الذي كان بطله الحكم جلال جيد، خلال المباراة التي جمعت المغرب الرياضي الفاسي بنظيره الوداد الفاسي، غادية وكتكبر وباين أن الجامعة الملكية لكرة القدم غادي تخرج بشي قرار صارم فحق الحكم.
كاميرا قناة الرياضية، التي نقلت المباراة التي جمعت الفريقين الفاسيين بمعلب مكناس، الأسبوع الماضي، رصدت حكم المباراة جلال جيد، وهو يقول لمساعد مدرب الوداد الفاسي بكل جرأة: “الله يرضي عليك راه جوج بيلانتيات كاع ما دويت عليهم”، قبل أن يرفع في وجهه البطاقة الصفراء.
وقال اسماعيل الجامعي، رئيس فريق المغرب الرياضي الفاسي، في تصريح ل”كود”، إن حكم المباراة دكدك الديربي ديال فاس، مضيفا بالقول: “هادشي ماشي عادل للكرة المغربية وللمغرب عامّة، خاصة أن الماتش كان منقول على قناة عبر الأقمار الاصطناعية، وتابعو الناس من الخارج.
وأضاف الجامعي قائلاً: “صحابي من الميركان عيطو عليا وكيقولو آش هاد لفضيحة، وتسائلو واش هادشي مزال ف المغرب، وهادشي اللّي وقع ف الديربي الفاسي مهزلة والرّيحة ديال هاد الناس اعطات، وحنا غادي اندخلو للقضاء اللي غادي يعرف شكون هو المسؤول على هادشي”.
وتابع الجامعي: “ميمكنش يجي حكم ويقول للمدرب انا حيت ليك جوج ضربات جزاء، وحتى المحللين الرياضيين قالو على أن الماص حيدو ليها جوج ضربات جزاء، خاصة وأن الوافا لا تتنافس على الصعود إلى القسم الوطني الأول، وكاين دبا جُوجْ احتمالات سواء الرّاك أو المحمدية اللي واقفين مورا هادشي، اللّي حرام وعيب، وحشومة يكون شخص يتحكم في الكرة المغربية وراه ذنوب فاسة صعاب”.
حكم مباراة الديربي الفاسي قال لمدرب الواف : "الله يرضي عليك تكالما … را 2 بينالتيات باينين ماهضرتش عليهم".
Publiée par GOUD sur Samedi 8 février 2020