أنا محمد سقراط خدام من الدار ساكن في حي ديال الطبقة الوسطى جاتني ورقة الخروج حتى للدار بينما الواليد بائع متجول ساكن في عزيب بقيوة مغوغة مور الشمس راه ربعيام وهو يمشي ويجي على ورقة الخروج باقي ماشدها آش هاد التمييز بين المغاربة.

أنا محمد سقراط ساكن في حي ديال الطبقة الوسطى في مدينة فاس جاتني الورقة ديال السماح بالخروج حتى لباب الدار موقعة توصلت بيها بكل أدب وإحترام، مادرت جوقة ماخرجت كنضارب عليها مع الناس مابقيت كنقلب على المقدم بالريق الناشف، داكشي لي علماتنا بيه السلطة هو لي وقع.
بينما الأب ديالي عبد المجيد سقراط بائع متجول ساكن فعزيب بقيوة مغوغة طنجة حي هامشي جنب المدينة حتى الطريق معندو، تلاتة ديال المرات وهو كيغامر ويمشي عند المقدم باش ياخد ورقة السماح بالخروج وكل مرة كيلقى المقدم مساليين ليه لوراق وكيقوليه حتى لغدا، ولحد الآن ربعيام ماخرج، ومحتاج يخرج باش يتقدى مستلزمات للدار والدوا ديال السكر ديالو، ومع ذلك باقي معندوش الورقة وماقادرش يخالف قوانين الدولة وخايف على راسو حيت عندو السكر ومستهدف من كورونا كثر من ناس خريين في صحة جيدة.
دابا أنا لي اصلا خدام من الدار وكولشي قريب ليا خضار كزار حانوت كارفور مرجان جاتني الورقة حتى لباب الدار، ولواليد لي كلس من الخدمة وساكن فقاع الدنيا خاصو يسافر الى بغا شي حاجة، وعندو سلعة حاصلة برا واحد الدار محتاج ضروري يمشي يدخلها هادشي الى ماتسرقات هاد ليام وراه باقي كيمشي كل نهار على ود ورقة الخروج، ولحد الآن باقي معندوش.
حسب الواليد المقدم ديال حومتو الله يعمرها دار ولكن ماجابوش ليه الوراق لي يفرق على الناس، هذا نداء للمسؤولين لي كيفرقو الوراق على المقدمية باش يعطيو للمقدم ديال عزيب بقيوة الوراق لي يفرق، ويتعاملو مع المغاربة بحال بحال، راه ماجاتش أن الاحياء ديال الطبقة المتوسطة والأحياء الراقية يعيشو ترف توصلهم الورقة ديال الخروج حتى للدار بينما أحياء الحوفارا والمقودة عليهم خاص يبقاو يداربو عليها يوميا باش يشدوها بحال لي واقع بالخمسة وربعين في فاس وفأحياء شعبية أخرى