لجنة اليقظة صادقات على إمكانية تأجيل خلاص الضرائب للمقاولات الصغرى والمتوسطة بسباب أزمة "كورونا".. والمقاولات ملزمة تخلص قبل 31 مارس

اعلن شكيب لعلج، رئيس الاتحاد العام لمقاولات المغرب، بللي لجنة اليقظة الاقتصادية صادقات على إمكانية استفادة المقاولات الصغيرة جدا والصغرى والمتوسطة، اللي كيقل رقم معاملاتها على 20 مليون درهم، من تأجيل أداء الضريبة إلى غاية 30 يونيو 2020.
وتم اتخاذ هذ القرار من بعد ما تضررات هذ المقاولات من تداعيات أزمة فيروس "كورونا" المستجد اللي تصابو بيه العشرات فالمغرب، وضطرو المسؤولين بسباب هذشي يعلنو على حالة الطوارئ الصحية.
أما بالنسبة للمقاولات اللي كيفوق رقم معاملاتها 20 مليون درهم، فطلب منها لعلج، فالرسالة نفسها، باش تخلص الضرائب اللي عليها قبل 31 مارس، أما اللي ماستاطعاتش بسبب الأزمة اللي كيمر منها المغرب، او كانت مزيرة ماديا، فيمكن ليها توجد ملف فيه تبرير للأسباب علاش ماخلصاتش أمام المديرية العامة للضرائب.
وبخصوص مضمون المرسوم رقم 2.20.292 المتعلق بسن أحكام خاصة بحالة الطوارئ الصحية، اللي تمت المصادقة عليه لبارح الاثنين، واللي كيتكلم على تأجيل الآجال المنصوص عليها فالنصوص القانونية والتنظيمية، وتوقيف احتسابها طيلة فترة حالة الطوارئ الصحية، كيقول لعلج بللي بللي هذ الآجال مكاتتعلقش بالآداء الضريبي.
وباش يقطع الشك باليقين، اتصل لعجل بالمديرية العامة للضرائب باش يسولها على هذ المرسوم، وواش ممكن للمقاولات تأجل آداءها للضرائب المستحقة بتاريخ 31 مارس إلى غاية 21 أبريل (نهاية الحجر الصحي)، وهي تأكد ليه بللي مكايتعلقش الامر كَاع بالضرائب المالية، وبللي تأجيل آداءها لا يعتبر حقا مكتسبا على المقاولات اللي كيفوق رقم معاملاتها 20 مليون درهم.
وأكد لعلج بللي الاتحاد العام لمقاولات المغرب، من خلال كل مكوناته، وباعتبارو عضو فلجنة اليقظة الاقتصادية، معبأ بالكامل ويعمل بتنسيق تام مع السلطات العمومية لإيجاد حلول للاجراء والمقاولات.