حرب نايضة بين وزارة الصحة والداخلية على إلغاء التظاهرات. مدير الأوبئة: الإلغاء زيادة وصافي

تحدى محمد ليوبي، مدير مديرية الأوبئة ومحاربة الأمراض، وزارة الحكومة المغربية ووزارة الداخلية بشكل ملحوظ، مللي قال بللي تأجيل التظاهرات والأنشطة الثقافية والرياضية فالمغرب بسبب إصابة جوج مغاربة بفيروس “كورونا” المستجد هو “أمر مبالغ فيه”.
وأكد ليوبي بللي وزارة الصحة ماعطات حتى أمر أو توجيه باش يتم إلغاء هذ الأنشطة بهذ الشكل، وبللي ممكن يكون السبب من إلغاءها ناجم عن تأويل التدابير الاحترازية اللي تقدمات بيها اللجنة الوطنية للقيادة بشكل غالط.
واستنادا لتصريح ليوبي، اللي عطاه ل”ميديا 24″، يمكن للواحد يفهم بللي الحكومة مانسقاتش مزيان مع وزارة الصحة قبل ما تاخذ هذ القرار، أو على الأقل مع مدير مديرية الأوبئة، واللي هو المعني الأول بالموضوع، وهذشي اللي حاول يلمح ليه هذ الأخير.
والقرار اللي اتخذاتو السلطات المغربية، من خلال دورية مستعجلة ليها، كيحث على إلغاء كَاع اللقاءات والمعارض والتظاهرات الرياضية اللي مشارك فيها البراني، وكَاع المهرجانات باستثناء المواسم، وعقد اللقاءات الرياضية المحلية شريطة تكون بدون جمهور، وهو القرار اللي ممكن يتسبب للمغرب فخسارة اقتصادية كبيرة بزاف، كيف ما قالوا خبراء اقتصاديين.
وقبل ما يصدر هذ القرار كانت اللجنة الوطنية للقيادة، اللي تأسسات من بعد ما بان الفيروس، قالت بللي ميمكن يتم إلغاء الأنشطة الثقافية والرياضية بسباب “كورونا”.