من بعد رضيع ميريكان.. رضيعة فالمغرب كتموت ب"كورونا".. واليوبي ل"كود": مزال ماعنديش معطيات عليها لكن بزاف دالرضع فالمغرب تقاسو بالفيروس"

توفات ليلة السبت الأحد رضيعة مغربية فعمرها 17 لشهر بفيروس "كورونا" المستجد، حسب ما أوردته قصاصة لوكالة الأناضول.
مسؤول طبي كشف للوكالة بللي حتى الأم ديالها مصابة بالفيروس، والأخيرة خاضعة للحجر الصحي بالمستشفى الجامعي بوجدة.
فاتصال "كود" مع محمد اليوبي، مدير مديرية الأوبئة والوقاية من الأمراض، للتأكد من صحة هذ الخبر، قال بللي ماعندوش معطيات كافية على اعمار وهوية الوفيات، وأن المعطيات والأرقام كتتحين بشكل مستمر كل يوم وهذشي كايزيد يصعب عليه التذكر.
ونفى اليوبي يكون الأمر بالضرورة كيتعلق بالرضيعة اللي تم الإعلان على إصابتها بالفيروس فبداية ظهور الوباء فالمغرب، على اعتبار ان الفيروس تقاصو بيه مجموعة من الاطفال والرضع فوسط 450 حالة تم الإعلان عليها لحد الآن.
وغير اليوم علنات ميريكان على وفاة رضيع بالفيروس، الشيء اللي كيعني أن "كورونا" مابقى يعقل لا على رضيع ولا على شيوخ، والحذر من الفيروسفهذ الفترة واجب، خصوصا وأن عدد الوفيات بلغ 26 وفاة، وفاق بكثير عدد المتماثلين للشفاء اللي هوما 13.