مدير مديرية الأوبئة كاعي وقال ل”كود”: شي وحدين كيتاصلو باليقظة باش يتفلاو.. وحنا مخصصين الرقم للكشف على الحالات المصابة ب”كورونا”

عبر محمد اليوبي، مدير مديرية الأوبئة ومحاربة الأمراض، على انزعاجو بسباب اتصال بعض الأشخاص بالرقم الاقتصادي ديال اليقظة الوبائية، باش يتفلاو أو يطرحو أسئلة على حالة المصاب اللول ب”كورونا”، فالوقت اللي وزارة الصحة خصصات هذ الرقم للناس اللي جاو من الدول الموبوئة، وشاكين واش تقاسو بالمرض.
وقال اليوبي، فتصريحو ل”كود”، بللي “هذ الرقم ما ممخصصش للناس اللي كيعيطو وكيسولو على الحالة ديال لبارح، واش جات من الطاليان ومن ميريكان، واش مغربي ولا طالياني، واش راجل ولا مرا، هذاك التيليفون عطيناه للأشخاص اللي فاش وصلو للمطار كانت الصحة ديالهم جيدة، ماعندهم حتى مشكل، لكن اكتشفو بللي صحتهم تدهورات من بعد، وشكو فإصابتهم بالفيروس”.
وكشف بللي كاينين أشخاص كيتاصلو باش يتفلاو، وكاينين اللي كايطرحو أسئلة وكايبقاو شادين الناس المكلفين بالاتصالات بالهضرة وكاياخدو ليهم وقت كبير، وزاد “هذ الناس كيحرمو وحدين ممكن يكونو من دوك الناس اللي توضع الرقم من أجلهم، حنا دايرين 4 أشخاص باش يجاوبو، وممكن يعيط شخص خامس كيهمو الامر ويلقى جميع الخطوط مشغولة، وتكون حالتو متدهورة، وهذشي ماشي معقول..”
وكانت اللجنة الوطنية للقيادة، اللي تدارت فور انتشار فيروس “كورونا” فالعالم وحصده لمئات الأرواح بشكل يومي، وضعات للناس اللي جاو من برا وشكو فإصابتهم بالفيروس رقم هاتفي اقتصادي ” آلو اليقظة الوبائية – 0801004747″، بالإضافة لتخصيصها لفضاء حول الفيروس على الموقع الإلكتروني وحسابات وزارة الصحة على شبكات التواصل الاجتماعي.