طبيبة مصابة ب"كورونا": الأعراض كانو خفيفة وكون عرفت راسي مريضة ماكنتش نمشي للخدمة.. ورئيس هيئة الأطباء ل"كود": 11 لطبيب تصاب بالفيروس والسر المهني كيمنعنا نعطيو تفاصيل

علنات طبيبة، فأوديو تبارطاجا بشكل كبير على تطبيق "واتساب"، إصابتها بفيروس "كورونا"، وشكرات فيه جميع الناس اللي وقفو معاها وتقلقو عليها، وأكدات فيه بللي كانت كتمشي للصبيطار وتخدم قبل ماتعرف بللي تصابت بالفيروس، وتمنات باش ماتكون عادات حتى واحد.
الطبيبة جاها "كورونا" من بعد ما مشات لكَنازة جارتها هذي 15 ليوم، واللي كانت ماتت ليها جداتها، وأكدات الطبيبة بللي مشات تعزيهم فثلث أيام، حتى عرفات من بود بللي جوج عيالات كانو فالكَنازا تقاسو، ومشات من بعد تدير التحاليل باش تتاكد واش تصابت بالفيروس ولا لا، حتى طلعو التحليلات إيجابيين.
واعترفات الطبيبة بللي مكانتش عارفة واش مريضة ولا لا، حيت الأعراض اللي جاوها خفاف بزاف، كانت فيها سخانة بسيطة، انسداد ديال النيف، والتهاب بسيط فالحلق، وكانت كتاخد دوا عادي ظيال الرواح.
الطبيبة خافت على ولادها لا يكونو تقاسو ب"كورونا"، كتقول بللي واحد فيهم مريض بالقلب، وهوما دابا كَالسين مع باباهوم.
وباش تتحقق من صحة الأوديو وداكشي اللي جا فيه، تاصلات "كود" ببوبكري محمدين، الكاتب العام للهيئة الوطنية للأطباء، اللي أكد ليها خبر إصابة الطبيبة ب"كورونا"، وقال بللي الأمر كيتعلق ب"طبيبة مختصة فطب الأطفال فمستشفى محمد الخامس بعمالة مقاطعات عين السبع الحي المحمدي فكازا"، وبللي مجموعة من المخالطين للطبيبة تم الوضع ديالهم فالحجر الصحي.
وزاد محمدين كيقول بللي فالطوطال كاين 11 طبيب مصاب بالفيروس، 7 منهم فكازا بوحدها، وجوج فالرباط، وجوج فتطوان، هذ الإصابات كاملة تم الكشف عليها غير فهذ الأسبوع.
ورفض محمدين الكشف عن مزيد من التفاصيل على اعتبار أن هذشي كيدخل فإطار السر المهني، ووضح "مادام هذ الاطباء مابغاوش يكشفو على هويتهم، فأنا ميمكليش نعطي تفاصيل كثر على تخصصهم او فين خدامين، لكن المؤكد أنهم كاينين 11".
وزاد كيقول بللي من الطبيعي الأطباء والصيدلانيين يتصابو بالفيروس، لأهم كيكونو أكثر عرضة ليه، من خلال اختلاطهم بالمرضى.