مديرية الصحة فكازا بغات متطوعين يعاونوها فمرضى "كورونا"

طلقات المديرية الجهوية للصحة فكازا باب الانخراط فعملية التكفل بمرضى فيروس "كورونا" المستجد للمتطوعين من مهنيي الصحة، باش تستعن بالخدمات ديالهم إذا اقتضت الضرورة، وهذشي فإطار الإجراءات الاستباقية للتصدي للوباء.
وحسب إعلان للمديرية، فتفتح باب التطوع فوجه المهنيين فقطاع الصحة، ومنهم حتى المتقاعدين، اللي كيشتغلو فميدان أمراض القلب والشرايين، وطب الأمراض التنفسية، وطب الإنعاش والتخدير، وطب المستعجلات، وكذلك الممرضين فمختلف التخصصات، والحاصلين على ديبلومات فالكليات والمعاهد الوطنية أو الخاصة المعتمدة من طرف الدولة وغير المدمجين فأسلاك وزارة الصحة.
وبالنسبة اللي توفرات فيهم الشروط وبغاو يشاركو فهذ العملية، فيمكن ليهم يبعثو بريد إلكتروني لvlntr.covid19.drscs@gmail.com ، فيه نموذج الترشيح اللي رفقاتو المديرية مع الإعلان، ونسخة من الدبلوم اللي حصل عليه المرشح، ونسخة من لاكارط ناسيونال.
وفنموذج الترشيح، غيخص المترشح يدير سميتو وكنيتو، وفوقاش تزاد، ونيميرو دلاكارط، والدبلوم اللي عندو، والتخصص، والعنوان ديالو، ورقم الهاتف، وخاصو يحدد المراكز الاستشفائية او المندوبيات اللي بغا يخدم فيها.