بسباب حالة الطوارئ فزمن كورونا.. تراجع كبير فنسبة حوادث السير والوفيات على الطرقات بالمقارنة مع العام اللي فات

علنات مديرية الأمن بللي نسبة حوادث السير المسجلة فالمدار الحضري تراجعات بواحد الشكل كبير فهذ الفترة ديال حالة الطوارئ الصحية اللي دارها المغرب بسباب فيروس كورونا المستجد.
وقارنات المديرية، فآنفوكَرافيك ليهاد بين الحوادث اللي وقعات بين 20 مارس و12 أبريل سنة 2019، وفهذ الفترة النيت فسنة 2020، وبان بللي فعلا كاين تراجع كبير فيها.
عدد الحوادث البدنية فهذ الفترة العام اللي فات كانت كتتحدد ف4 آلاف و616 حادثة، فالوقت اللي تسجلات هذ العام فهذ الفترة بالذات غير 942 حادثة بدنية، يعني تراجعات الحوادث بنسبة 79,59 فالمية
بالنسبة للوفيات، فتسجلات بين 20 مارس و12 أبريل 2019 تحديدا 58 وفاة، فالوقت اللي بلغ عدد الوفيات هذ العام فنفس الفترة غير 20 وفاة، يعني تراجعات الوفيات ب65,52 فالمية
وبالنسبة للجروح البليغة، تسجلات ف هذ الفترة ف2019 تحديدا 249 جرح بليغ، بينما تسجلات فهذ الفترة هذ العام 52، يعني كاين تراجع فالإصابات البليغة ب79,12 فالمية.
أما على مستوى الجروح الطفيفة، هذ الفترة بالذات ف2019 سجلات 5 آلاف و959 إصابة طفيفة، و2020 غير ألف و129 إصابة، بمعنى كاين تراجع بنسبة 81,05 فالمية فالجروح الطفيفة.