رئيس الجمعية المغربية لحقوق الإنسان ل"كود": كنتضامنو مع المثليين ضحايا حملة شرسة فالسوشل ميديا.. وكانطالبو المركز الوطني لحماية المعطيات الشخصية بالتدخل باش يحميهم

استنكر عزيز غالي، رئيس الجمعية المغربية لحقوق الإنسان، الحملة "الشرسة" اللي تدارت على المثليين فمواقع التواصل الاجتماعي، بعدما كشفات المتحولة صوفيا طالوني على ثلاث تطبيقات خاصة بالمثليين، الشيء اللي خلا مجموعة من المتخلفين يهزو تصاورهم ومعطياتهم الشخصية ويسبوهم على مواقع التواصل الاجتماعي.
غالي قال، فتصريح ل"كود"، بللي الجمعية متضامنة مع ضحايا هذ الحملة، وموقفها دائما مع جميع أشكال الحريات الفردية اللي كتعتبرها الجمعية جزء لا يتجزأ من حقوق الإنسان.
وقال بللي كيخص المركز الوطني لحماية المعطيات الشخصية يتدخل باش يوقف التشهير بهذ الناس، ويحمي معطياتهم الشخصية، ويقوم بنفس العمل اللي كتقوم بيه الهاكا فالجانب الإعلامي.
واستغرب الحقوقي تزامن هذ الحملة مع اقتراب شهر رمضان، واعتبر بللي هذشي مغرض نوعا ما وكيطرح مجموعة ديال علامات استفهام، على اعتبار أن رواد هذ الحملة مابغاوش الناس تدوز هذ المرحلة بشوية ديال الإطمئنان والتمتع بالحقوق، والناس تخلي الناس تعيش الحرية ديالها كيف بغات بما لا يؤدي الآخرين.
وحسب غالي، فالجمعية عندها تخوف من يتم استغلال هذ الحملة باش تتدخل الحكومة وتدير قوانين صارمة ديال استعمال وسائط التواصل الاجتماعي، واللي يمكن تمشي لأبعد حد وتضيق على حريات التعبير، خصوصا بعدما وقع نقاش فالأغلبية على قانون من هذ النوع كان تعرض على الحكومة.