واخا الرحلات الجوية والبحرية معلقة بسباب كورونا.. إيطاليا قررات ترجع مواطنيها للطاليان من المغرب على 6 دفعات وها كيفاش

علنات السفارة ديال الطاليان فالرباط، بشراكة مع القنصلية ديال الطاليان فكازا، على تنظيم ل6 رحلات باش ترحل المواطنين ديالها اللي حصلو فالمغرب للطاليان بعدما تعلقو الرحلات بسباب فيروس كورونا المستجد، ومن ضمنهم حتى المغاربة اللي عندهم جنسية مزدوجة (مغربية وإيطالية)، وكيتعلق الأمر بخمسة دالرحلات الجوية، ووحدة بحرية.
وعلى هذشي، طلبو السفارة والقنصلية دالطاليان فكازا، من الطاليانيين، واللي عندهم جنسية مزدوجة، والمغاربة اللي عندهم تصريح منتظم للإقامة فالطاليان، واللي باغيين يرجعو للطاليان من المغرب بصفة عامة، يسيفطو لكل من السفارة والقنصلية مجموعة من المعلومات الشخصية، من ضمنها الإسم الكامل، وتاريخ ومكان الازدياد، ورقم الباسبور، ورقم تصريح الإقامة وصلاحيتو (بالنسبة للناس اللي عايشين فالطاليان وماعندهمش الجنسية)، والنمرة ديال التيليفون.
القنصلية ديال الطليان فكازا وسفارة الطاليان فالرباط كذلك طلبو من الناس اللي بغاو يرجعو للطاليان باش يديرو معلومات على الوسيلة اللي دخلو بيها للمغرب (بالطيارة ولا بالباطو) وإلى كان بالباطو يحددو واش دخلو معاهوم طوموبيلات ولا لا، والأسباب الاجتماعية والإنسانية اللي خلاتهم يفكرو فالخروج برا، وكيتعلق الأمر بالاحتياجات الطبية وتعزيز هذ الحاجة بشهادة طبية، أو لأسباب أسرية من بعد ما انفصلو الابوين على الأطفال ديالهم بسبب الفيروس، وخصوصا فيهم القاصرين.
وكل هذ المعلومات غايكونو المعنيين بالأمر ملزمين باش يعلنو عليها فوثيقة، وضعاتها وزارة الخارجية فالموقع ديالها الرسمي، وهوما ملزمين بتش يسيفطوها فإيمايل قنصلية كازا casablanca.urp@esteri.it، وسفارة الرباط consolare.rabat@esteri.it
واستندات السفارة والقنصية على قرار وزير الصحة الإيطالي، بتنسيق مع وزير النقل، باش يتم ترحيل المواطنين الإيطاليين يكون غير للضرورة القصوى، وهذ الناس ملزمين يديرو الحجر الصحي بعد وصولهم للتراب الإيطالي لمدة 14 ليوم فمستشفى خاص، على حساب اللي جا فالقرار نفسو.