رئيس نقابة أطباء القطاع الحر ل"كود": قدمت استقالتي من المكتب الوطني لهيئة الأطباء حيت اتخذات قرار كيضر المواطن الفقير وأنا مايمكنش نلطخ سمعتي

قدم الدكتور بدر الدين داسولي، رئيس نقابة أطباء القطاع الحر، استقالته، اليوم الأحد من المكتب الوطني للهيئة الوطنية للأطباء، بسبب "المسار غير التشاركي وغير الديمقراطي اللي اتخذاتو الهيئة فالجمع العام ديالها الأخير بتاريح 10 و11 يناير"، على حد قولو.
وزاد داسولي كيقول، فتصريحو ل"كود"، بللي الجمع العام الأخير ديال الهيئة كانت فيه تشريعات خارجة على القانون، "حيت عطات الهيئة للأساتذة الجامعيين وأطباء القطاع العمومي باش يخدمو فالقطاع الخاص".
وقال بللي هذ القرار اللي تاخداتو الهيئة غيخلي جميع الأطباء ديال القطاع العمومي يتحولوا للقطاع الخاص والسبيطارات العمومية غيخواو والمريض الفقير مغايبقاش عندو فين يمشي يداوا.
وأكد بللي هذشي للي تاخداتو الهيئة كيخالف مجموعة من القوانين أبرزها قانون الوظيفة العمومية فالمادة 15 منه، وقانون 131.13 فالمواد 2 و3 و108 و110′′.
وفظل هذشي، قال داسولي: "أنا مايمكنش ننخرط فهذ القرار ونلطخ سمعتي كمناضل كيدافع على حق المواطن فالعلاج والتداوي، وبالتالي قررت نقدم استقالتي من المكتب الوطني للهيئة، وندافع من موقعي كرئيس لنقابة أطباء القطاع الحر على المواطن ضد مثل هذه القرارات غير العادلة".
واليوم الأحد فالصباح، توصلات "كود" بنسخة من استقالة الدكتور بدر الدين داسولي من المكتب الوطني للهيئة واللي تحدث فيها عن رفضو لقرار جمعها العام الأخير، بالإضافة لتفكيرو فالاستقالة بعد الحيف والإقصاء اللي عرفو القطاع الخاص واللي ماخلاهش يقوم بمهامو على أكمل وجه.