وعلاش سكتي كاع هاد الوقت علاش وعلاش نسيتي اسبانيا. بوريطة: لمغاربة اللي عندهم الباسبور البلجيكي والهولندي عاناو من التمييز فالاجلاء

ناصر بوريطة وزير الخارجية والتعاون فاشل فالتواصل وكيعيب على دول بحال اسبانيا وبلجيكا علاش جبدات المغرب وقالت باللي الرباط اللي رفضات تسمح للي عندهم الجنسية المزودجة يرجعو لهاد الدول.
حتى اليوم الخميس 23 ابريل 2020 باش جا لمجلس النواب عاد وزير خارجيتنا هجم على بلجيكا وهولندا. قال باللي هاد الدول دارو تمييز ضد كل هولندي وبلجيكي من اصل مغربي اثناء اجلاء الدولتين لمواطنيهم من المغرب. بوريطة اللي كان اليوم فلجنة الخارجية والدفاع الوطني والاوقاف والشؤون الاسلامية مجلس النواب قال باللي المغرب ما دخلش فاعداد حتى شي لائحة مع هاد الدول.
فحالة هولندا قال الوزير باللي دارت رحلات كثيرة ولكن هي اللي كانت كتحكم فاللوائح ماشي المغرب. مع بلجيكا قال بوريطة باللي التواقف اللي كان مع لبلاجكة فيه نقل مواطنين لاسباب انسانية صافي.
وزير الخارجية اكد باللي المغرب سهل لكاع الدول تدي ناسها وباللي كانت اكثر من 500 رحلة وباللي ما دخل فاعداد حتى شي لائحة من اللي خاصهم يرجعو لهاد الدول.
اللي غريب هو علاش بوريطة سكت هاد المدة كلها. علاش سكت باش بلجيكا وهولندا وهادي ويومين اسبانيا كلهم قالو باللي المغرب هو اللي ما خلاش اللي عندهم جنسية مزدوجة : مغربية وجنسية هاد الدول= يخرجو من المغرب.
لاحظتو انو جبد غير جوج دول وسكت على اسبانيا. فحالة امريكا كانت واضحة. دات كاع مواطنينها وحتي اللي عندهم لگرين كارط.
هاد الدول ايلى كانت بصاح كذبات على المغرب علاش تسنيتي تقريبا شي شهر عاد كتهدر اليوم. صافي اللي عطى الله عطاه